[caption id="attachment_52918" align="aligncenter" width="560"] Foto: life.ru[/caption]
Meksıkanyń Gerrera shtatyndaǵy Sıýdad-Altamırano qalasynyń meri Ambrozıo Soto esirtki satýshylardyń qolynan qaza tapty.
Qarýlanǵandar joldy tolyǵymen qorshap alyp, birneshe kólikke oq jaýdyrǵan. Saldarynan qala basshysy oqıǵa ornynda til tartpaı ketse, eki polıseı aýyr jaralandy. rt.com aqparyna sáıkes, qala turǵyndary men kásipkerleri atyshýly esirtki tasymaldaıtyn toptarǵa aqsha berýge májbúr ekenderin aıtqan. Bul isti Ambrozıo Soto oryndamaǵandyqtan, olar qandy áreketterin júzege asyrypty.
Osymen sońǵy eki kún ishinde eki birdeı qala meri qaza bolyp otyr. Birer kún buryn Chıapas shtatyndaǵy San-Hýan-Chamýla qalasynda qaqtyǵys oryn alyp, ákim Domıngo Lopes Gonsales opat boldy.
lenta.ru málimeti boıynsha, narazylyq bildirgender basshydan qoǵamdyq jumystarǵa jáne jergilikti qolónershilerdi qoldaýǵa qarjy bólýdi talap etken. Alaıda, Domıngo Lopes kúzetshileriniń kómegimen olardy qýyp shyqpaq bolypty. Bul iske ashýlanǵan top oǵan oq jaýdyrǵan. Oqys oqıǵadan taǵy da bes adam qaza taýyp, 12-i jaralandy.
Meksıkada sońǵy on jyl ishinde 75 qala meri oqys oqıǵalardan opat bolǵan eken.
Aıan ÁBDÝÁLI