fotokórmesi Máskeý tórinde ashyldy
Máskeý ortalyǵyndaǵy Nıkolskıı kóshesindegi «Revolıýsııa alańy» metro stansasynyń mańynda «Qazaqstan – Uly Dala eli» taqyrybynda fotokórme ashyldy. Ony Qazaqstannyń Reseıdegi elshiligi men «National Geographic Rossııa» jýrnaly uıymdastyrdy.
Ekspozısııaǵa Qazaqstannyń tabıǵatyna, sondaı-aq, Almatyda ótetin qysqy Ýnıversıada-2017, Astanada uıymdastyrylatyn EKSPO-2017 halyqaralyq kórmesine arnalǵan 60-tan astam sýret týyndysy qoıylǵan. Atalǵan sýretterdiń avtory, «National Geographic Rossııa» jýrnalynyń shef-fotografy Andreı Kamenev osy kórme úshin Qazaqstanǵa baryp, bir aı shamasynda arnaıy fotoekspedısııaǵa qatysqan eken.
Sharanyń ashylýynda sóz alǵan jýrnaldyń bas redaktory Andreı Palamarchýk «Qazaqstan – Uly Dala eli» fotokórmesin uıymdastyrý bıyl qazaq tilinde «National Geographic Qazaqstan» jýrnalynyń jaryq kórýimen baılanysty ekenin aıtty. Sonymen qatar, ol ekspozısııanyń basty taqyryptarynyń biri Astana tórinde ótetin EKSPO-2017 kórmesi ekenin atap ótti. «EKSPO-2017 «Bolashaq energııasy» taqyryby – adamzat úshin óte ózekti, jýrnalymyz úshin de óte jaqyn. Sebebi, bizdiń mıssııamyz – Jer sharyn qorǵaý, sol arqyly oqyrmandarymyzdy osyǵan tartý ári qyzyqtyrý», – dedi A.Palamarchýk.
Qazaqstannyń Reseıdegi elshiliginiń keńesshisi Marat Syzdyqov: «Eýrazııa keńistiginiń ortasynda ornalasqan Qazaqstanda Eýropa men Azııanyń túrli boıaýmen kórkemdelgen landshafty kezdesedi», – deı kele, kópshilik atalǵan fotokórme arqyly buǵan kóz jetkize alatynyn jetkizdi, sonymen birge, jınalǵan qaýymdy qonaqjaı qazaq eline baryp, onyń tańǵajaıyp jerlerin tamashalaýǵa shaqyrdy. Al «Astana EKSPO-2017» Ulttyq kompanııasy AQ Marketıng, ilgerileý jáne týrızm departamenti dırektorynyń orynbasary Jámıla Nurqalıeva «National Geographic Rossııa» jýrnalyna jáne Qazaqstannyń Reseıdegi elshiligine atalǵan fotokórmeni uıymdastyrǵany úshin alǵysyn bildire kelip, keler jyly elordada ótetin EKSPO-2017-ge qatysýǵa shaqyrdy jáne qazirdiń ózinde halyqaralyq kórmeniń bıletteri satylymǵa qoıylǵanynan habardar etti.
Fotokórmeniń ashylýyna arnalǵan saltanatty sharanyń sońy Máskeýdiń Qazaq ulttyq-mádenı avtonomııasynyń tóraıymy Dámeli Tasmaǵanbetovanyń uıytqy bolýymen ázirlengen konsertke ulasty. Al fotokórmeniń ózi bıylǵy jyldyń 24 tamyzyna deıin jalǵasady.
Láıla EDILQYZY,
«Egemen Qazaqstan»