Angela Merkel óz elinde bolǵan terrorlyq shabýyldardy qatań aıyptaǵanymen, bosqyndarǵa qatysty saıasatty ózgertý týraly usynystardy qabyldamaı tastady. Kansler jýrnalıster aldynda sóılegen sózinde terrorıster Germanııanyń «muqtaj jandardy qabyldaý» ázirligine yqpal etkisi keletinin atap ótti.
Aldaǵy qyrkúıek aıynda Reseı men Qytaı daýly jer – Ońtústik Qytaı teńizinde áskerı-teńiz kúshteriniń jattyǵýyn ótkizbek. Bul jattyǵý Ońtústik Qytaı teńizi aımaǵynyń aýmaqtyq mártebesine qatysty daý kúsheıgen tusta óteıin dep otyr.
Túrkııa bıligi júzden astam jergilikti buqaralyq aqparat quraldarynyń jabylatynyn jarııalady. Olardyń úsheýi aqparat agenttigi, on altysy telearna, otyzy baspahana, qyryqtan astamy basylymdar.
Aýǵanstan keshe Dúnıejúzilik saýda uıymyna resmı túrde múshelikke kirip, uıymnyń 164-inshi múshesi atandy. Erejelerge sáıkes, Aýǵanstannyń DSU-ǵa kirýi týraly sheshim juma kúni avtomatty túrde kúshine endi.
Rım papasy Fransısk Polshada messa ótkizetin minbege bara jatqan kezde kenetten qulap qaldy. Dinı qyzmetkerler dereý kómek kórsetkennen keıin ol jınalǵandar aldynda sóz sóıledi.
Nıgerııadaǵy «Boko haram» terrorıstik tobynyń sodyrlary sońǵy jarty jylda 50 jasóspirimdi terrorshy-jankeshtige «tárbıelep» shyǵarǵan. BUU Bas hatshysynyń qoǵamdyq máseleler boıynsha orynbasary S.O’Braıenniń málimdeýinshe, osy jasóspirimder Afrıkanyń tórt elinde terrorlyq aktiler jasaǵan.
Sırııa armııasy kóterilisshilerdiń baqylaýyndaǵy Aleppo qalasyna basyp kirýge daıyndalýda. Osyǵan baılanysty olar turǵyndarǵa qaladan qalaı shyǵýdyń tártibi kórsetilgen paraqshalardy áýeden tastap jatyr.
AQSh prezıdenti Barak Obama Demokratııalyq partııanyń sezinde sóılegen sózinde Hılları Klınton Qurama Shtattar tarıhynda eń jaqsy prezıdent bolady dep málimdedi.
Nepalda taý ishindegi jolmen kele jatqan jolaýshylar avtobýsy 100 metrlik quzǵa qulady. Saldarynan 15 adam mert bolyp, 35 jolaýshy túrli jaraqatpen aýrýhanaǵa jetkizildi.
Internet materıaldary negizinde ázirlendi