Oblystyq Dostyq úıinde Semeı ıadrolyq synaq polıgonynyń (SIаSP) jabylýyna 25 jyl tolýyna oraı arnaıy shara bolyp ótti. Oǵan ıadrolyq synaq polıgony ardagerleri men múgedekteri, lokaldy soǵysqa qatysýshylar, memlekettik organdar men úkimettik emes uıymdar ókilderi qatysty.
– Bıylǵy jyldy asa mańyzdy beles deýge bolady. Elimiz Táýelsizdiginiń 25 jyldyǵy qarsańynda kóptegen aýqymdy sharalar uıymdastyrylýda. Solardyń qatarynda Semeı ıadrolyq synaq polıgony jabylýynyń 25 jyldyǵy da bar. Qazaqstan Respýblıkasynyń Prezıdenti Nursultan Nazarbaevtyń 1991 jyldyń 29 tamyzyndaǵy SIаSP jabý týraly Jarlyǵy asa mańyzdy sheshimderdiń biri bolyp tabylady. Osy kúni ıadrolyq polıgon tarıhynda jańa dáýir bastaldy. Elbasynyń bastamasymen Qazaqstan ıadrosyz álem qurýdaǵy kóshbasshy el retinde tanyldy, – dep atap ótti oblystyq ishki saıasat basqarmasynyń basshysy Erbol Nurǵalıev.
Jergilikti atqarýshy organdar osy sanattaǵy adamdardyń quqyqtary men múddelerin qorǵaý baǵytynda barlyq sharalardy qolǵa alyp keledi. El zańnamalary men áleýmettik qoldaý baǵdarlamalarynda kózdelgen sharalardy júzege asyrýǵa baǵyttalǵan jumystar júrgizilýde. Mysaly, máslıhattardyń sheshimderimen Uly Otan soǵysyna qatysýshylar men múgedekterine teńestirilgen adamdarǵa Jeńis kúni qarsańynda Aqtóbe qalasy boıynsha 32 aılyq eseptik kórsetkish nemese 67 872 teńge, aýdandarda 50 myń teńgeden ótemaqy tólendi. Qalalyq máslıhat depýtattarynyń sheshimderi boıynsha, 2013 jyldan beri UOS qatysýshylary men múgedekterine teńestirilgen adamdarǵa kommýnaldyq tólemderge jylý maýsymy kezeńinde 1,7 AEK (3605 teńge) tólenedi, elimizdegi sanatorıılerge tegin joldamalar beriledi.
Shara barysynda SIаSP jabylýynyń 25 jyldyǵyna oraı, ardagerlerge oblys jáne qala basshylarynyń Alǵys hattary tabystaldy.
Satybaldy SÁÝIRBAI,
«Egemen Qazaqstan»
Aqtóbe oblysy