Bul týraly Qazaqstan musylmandary dinı basqarmasyna (QMDB) qarasty dinı oqý oryndary basshylarynyń Bas múftıge esep berý jıynynda QMDB Dinı bilim jáne ǵylym bóliminiń meńgerýshisi Baqtybaı Beısenbaev habarlady. Onyń málimdeýinshe, orta jáne joǵary bilimdi mamandar daıyndaıtyn dinı oqý oryndaryna barlyǵy 373 oqý granty jergilikti jáne memlekettik bıýdjetten bólingen.
«2016-2017 oqý jylyna joǵary bilimdi mamandar daıyndaıtyn Almatydaǵy «Nur Múbárak» ýnıversıtetine 198 grant bólindi. Onyń 190-y – bakalavrǵa, 5-eýi – magıstratýraǵa, 3-eýi PhD doktorantýraǵa bólindi. Al Ońtústik Qazaqstan oblysyndaǵy «Shymkent» jáne «Saryaǵash» medrese-kolledjderine 175 oqý granty bólindi. Medrese shákirtteri arnaıy shákirtaqy alady», – dep málimdedi B. Beısenbaev.
«О́zderińiz jaqsy bilesizder, Dinı basqarma «Qazirgi zamannyń úzdik 500 aǵartýshy ımamy» jobasyn qolǵa aldy. Imam-moldalardyń bilimin udaıy jetildirip otyrý – bizdiń basty nazarymyzda. О́ıtkeni, búgingi din qyzmetkeri ýaqyt talabynan áste qalys qalmaýy tıis. Biz qazirgi ımamdardan únemi ózderin damytyp, jetildirip, dinı hám zaıyrly bilimmen sýsyndap otyrýyn talap etemiz. 2 jyldyń kóleminde ımamdarymyzdyń 80 paıyzyn attestasııadan ótkizip, bilim deńgeıin anyqtap, synaqtan súringenderdi qaıta oqytyp jatyrmyz. Myqty dinı kadr medresede qalyptasady. Sondyqtan sizderdiń jumystaryńyz úlken mańyzǵa ıe. Al ýnıversıtetimiz ben medresemizge oqý granttarynyń berilýi – memlekettiń úlken qoldaýy, qamqorlyǵy ekenin umytpaýymyz kerek», – dep atap ótti Bas múftı Erjan qajy Malǵajyuly.
Búginde Dinı basqarmaǵa qarasty 1 ýnıversıtet, 1 ımamdardyń bilimin jetildirý ınstıtýty, 9 medrese, 2 qarılar ortalyǵy jumys isteıdi. Atalǵan dinı oqý oryndarynda 2856 shákirt bilim alýda. Atap aıtqanda, «Nur Múbárak» ýnıversıtetinde – 1130 stýdent, 9 medresede – 1321 shákirt, qarılar ortalyqtarynda – 225 shákirt, bilim jetildirý jáne daıyndyq kýrstarynda 180 shákirt dáris tyńdaıdy.
Al 9 medreseniń 3-eýi («Úshqońyr», «Shymkent», «Saryaǵash») kolledj deńgeıine kóterildi. Qalǵan medreseler kolledj deńgeıine kóterilý baǵytynda tıisti talaptardy oryndap, qajetti qujattardy rásimdeý ústinde. Onda dinı pándermen qosa zaıyrly pánder de oqytylady. Medrese-kolledjdi bitirgen túlekter dinı salada, sonymen qatar memlekettik salada da qyzmet ete alady.
Áıgerim Toqsanbek