Jýrnalısterdiń kótergen máselesi óte oryndy. Qazaqstannyń eńbek sińirgen qaıratkeri, Qazaq radıosynyń «Altyn qor» bóliminiń jetekshisi Altyn Imanbaevanyń Qarashash Toqsanbaıǵa bergen «Altyn qordyń» ahýaly alańdatady» degen suhbatynan osy qordyń múshkil haline qanyq boldym. Shyndyǵynda da, jetpis jyl boıy tirnektep jınaǵan mol baılyqty kútip-baptap, tolyq saqtap qalý búgingi kúnniń úlken bir talaby ekeni ámbege aıan.
Teńdesi joq rýhanı azyqtyń kóp jyl boıy radıodan berilmegeni de ras. Osy ýaqytqa deıin jaǵdaı jasalmaı, tistegenniń aýzynda, ustaǵannyń ýysynda kelgen qordy bir júıege keltirip, tehnıkalyq suranystaryn qanaǵattandyratyndaı ýaqyt jetipti.
Asyldarymyz ben arystarymyzdyń daýysyn, aıtqan áńgimeleri men oryndaǵan tamasha týyndylaryn saqtap otyrǵan «Altyn qordy» Qazaq radıosynyń ǵımaratyndaǵy óz ornynan qozǵamaý kerek. Baǵa jetpes altyn daýystar bizdiń keleshek urpaǵymyz úshin taptyrmaıtyn rýhanı baılyq. О́tkenimizdi keleshekke kıe etý – jer basyp júrgen adamdardyń asyl boryshy. Sondyqtan, kóp jyl boıy jınaqtalǵan altyn qordy shashaý shyǵarmaı kóshirip, halyq ıgiligine jaratý negizgi baǵdarsham bolǵanyn qalaımyn.
«Altyn qordyń» strategııalyq máni bar ekenin uǵýymyz qajet. Qazaq halqynyń rýhanı betkeustar qaıratkerleri bolyp, «Altyn qordyń» órkendeýine, fonomaterıaldarynyń kóbeıýine, isiniń alǵa basýyna at salysaıyq.
Maǵıra QOJAHMETOVA,
«Balbulaq», «Dertke daýa» basylymdarynyń bas redaktory,
Qazaqstannyń eńbek sińirgen qaıratkeri