«Bul kúnde Qazaqstannyń quqyqtyq statıstıka jáne arnaıy esepke alý organdary ózderiniń 20 jyldyǵyn atap ótýde. Osy ýaqyt ishinde quqyqtyq statıstıkalyq qyzmettiń kásibı qoǵamdastyqta bedeldi artyp, memlekettik basqarý júıesinde laıyqty oryn aldy jáne eldegi zańdylyq pen quqyqtyq tártipke qatysty obektıvti aqparattyń ordasyna aınalyp úlgerdi», dedi J.Asanov.
Onyń aıtýynsha, qazirgi kezdegi quqyqtyq aqparat jáne qadaǵalaý qyzmeti bul ózara baılanysty quramdas salalar bolyp tabylady. Tipti, birinsiz ekinshisiniń qyzmeti alǵa basýy múmkin emes kórinedi.
«Aıtalyq, qadaǵalaý shegi júıelik derekterdiń negizinde belgilenetindikten, biz onsyz adasyp qalamyz. Al QSAEK-te atqarylǵan jumystar, oǵan qosa engizilip jatqan taldaýdyń zamanaýı ádisteri qadaǵalaýdyń nátıjeli bolýyna múmkindik beredi. Osylaısha, júıeli máselelerdi anyqtap, túıindi der kezinde tarqatatyn bolamyz», dedi Bas prokýror.
Al óz kezeginde sóz alǵan Baǵdat Mýsın áriptesterin Quqyqtyq statıstıka jáne arnaıy esepke alý organdarynyń 20 jyldyq mereıtoıymen quttyqtady.
«Osy jyldar ishinde komıtet úlken ister atqardy. Búgingi tańda komıtettiń júıeleri quqyq qorǵaý jáne ózge de memlekettik organdardyń jumys quraly bolyp otyr. Jaqsy derekter bazalary jáne túrli platformalar bar, olardyń negizinde biz odan ári damyp, jańa ıdeıalar men jobalardy júzege asyrmaqpyz», dedi B.Mýsın.
Jıyndy qorytyndylaǵan sala mamandary pikir almasyp, keńese kele, komıtet qyzmetin zaman talabyna saı jetildire túsý úshin úsh negizgi mindetti belgiledi. Onyń alǵashqysy – «quqyq qorǵaý júıesiniń prosesterin jáne memlekettik organdardy sıfrlandyrý» tetigi bolsa, onyń aıasynda elektrondy rásimderdi engizý arqyly qaǵazbastylyqty joıý kózdelýde. Mundaı qadam málimetterdiń burystyǵyn azaıtyp, isterdi tergeý jedeldigin arttyrady jáne sáıkesinshe sybaılas jemqorlyq qaýpin tómendetedi. Ekinshi mindet – «aqparat qundylyǵyn arttyrý». Bul áreket prosesterdi algorıtmdendirý, taldaý jumysyn avtomattandyryp, ishki jáne syrtqy derekterdiń baılanysy bolyp tabylatyn Taldaý ortalyǵyn qurýǵa jáne sol arqyly krımınogendik boljamdar berýge múmkindikter beredi. Sońǵysy – «biz halyqqa jaqyndap kelemiz» jobasy boldy. Onyń aıasynda Quqyqtyq qyzmetter ortalyǵyn qurý jáne «Tıimdi shaǵymdar qoǵamyna» jobasyn júzege asyrý kózdelýde. Onyń basty maqsaty – azamattardyń máselelerin sheshý jáne olardyń ótinishterin nátıjeli qaraý.
Nurlybek DOSYBAI,
«Egemen Qazaqstan»