Keıingi jyldary Shyǵysta kásipkerlikke bet burǵandar kóp. Taıaýda «Qazaqstannyń úzdik ónimi – 2026» jáne «Bir aýyl – bir ónim» atty kórme-baıqaýlary bastaldy. Shyǵys Qazaqstan kásipkerleriniń úzdik taýarlary men ónimderi usynylǵan is-sharaǵa oblys ákimi Nurymbet Saqtaǵanov qatysty.
– Bul kórme otandyq kásiporyndardyń jetistikterin keńinen tanystyrýǵa, sapaly ónim óndirýshi baǵasymen usynýǵa, jańa iskerlik baılanystar ornatýǵa jáne óńirdiń óndiristik áleýetin damytýǵa jol ashatyn biregeı alań. Otandyq ónimderdiń sapasyn arttyrý, olardyń básekege qabilettiligin kúsheıtý jáne jergilikti taýar óndirýshilerdi qoldaý kórmeniń basty maqsaty. Búgingi kórmege oblysymyzdyń 100-ge jýyq kásipkeri qatysyp, óz ónimderi men jetistikterin kópshilik nazaryna usynyp otyr, – deıdi N.Saqtaǵanov.
Aıta ketsek, ótken jyly óńirdiń 7 kásiporny sapa men bıznestiń áleýmettik jaýapkershiligi salasyndaǵy bedeldi respýblıkalyq baıqaýlarda joǵary marapattarǵa ıe boldy. Bul Shyǵys Qazaqstan kásipkerleriniń sheberlikterin, damýǵa degen umtylysynyń jáne qyzmetin úzdiksiz jetildirýge degen talpynysynyń aıqyn dáleli.
2025 jyly Prezıdenttiń «Altyn sapa» syılyǵynyń laýreattary atanǵan oblys kásiporyndary qatarynda «Úzdik óndiristik maqsattaǵy kásiporyn» atalymy boıynsha jeńimpaz atanǵan «Sılýmın-Vostok» JShS jáne «Azyq-túlik taýarlaryn nemese aýyl sharýashylyǵy ónimderin shyǵaratyn úzdik kásiporyn» atalymynda úzdik dep tanylǵan «Emıl» JShS bar.
«Atameken» Ulttyq kásipkerler palatasy júzege asyryp jatqan «Bir aýyl – bir ónim» jobasynyń óńirlik kórmesinde ShQO-nyń barlyq derlik aýdandarynan kelgen 40-tan astam qatysýshy óz ónimderin usyndy. Saraptamalyq komıssııa jartylaı fınalǵa shyqqan 20 kásipkerdi iriktep alady. Olar óz jobalaryn qorǵaýǵa usynady. Baıqaý qorytyndysy boıynsha granttyq konkýrsqa qatysý múmkindigine ıe bolatyn jáne 5 mıllıon teńgege deıin qarjylandyrýǵa úmitker 10 jeńimpaz anyqtalmaq. Ondyqtan kórinýge árkim úmitti.
– Bul kórmege bal, túrli shópterden jasalǵan shaı alyp keldim. Shyǵaryp jatqan ónimderim suranysqa ıe. Shóp shaıdyń paıdasy zor ekeni belgili, ımmýnıtetti kóteredi. Naqtyraq aıtsaq, 20 túrli shópten 6 túrli shaı shyǵaramyz. Sońǵy shyǵarǵan ónim Túıetaban shyryny. Bul asqazannyń emi. Ásirese jaman aýrýdyń aldyn alady, – deıdi kásipker Almas Tańǵytuly.
Oblys ákimi kórmeni aralap, jergilikti taýar óndirýshilerdiń ónimderimen tanysyp shyqty. Bal jáne ara sharýashylyǵy ónimderi, dárilik shóp shaılar, ulttyq aspaptar, kıimder men aksessýarlar, kıizden, júnnen jáne tabıǵı bylǵarydan jasalǵan buıymdar, toqyma oıynshyqtar, zergerlik buıymdar, qymyz jáne sút ónimderi, aǵashtan jasalǵan buıymdar men úıge arnalǵan dekor zattar jáne basqa da túrli taýarlar kóptiń nazaryna qoıyldy.
Shyǵys Qazaqstan oblysy