Abaı oblysy Besqaraǵaı aýdanynyń Morozov orman sharýashylyǵy, Bashkól, Jylandy, Mostık, Kishi Vladımırovka aýyldarynyń turǵyndary sapaly aýyzsýmen qamtamasyz etildi.
Oblys ákimi Berik Ýálı aýdandaǵy halyqty sapaly aýyzsýmen qamtýǵa baǵyttalǵan birqatar nysandy aralap kórdi. Aımaq basshysy áýeli Morozov orman sharýashylyǵyndaǵy sý berý stansasynda boldy. Shaǵyn eldi mekende 254 adam turady. Bul aýylda buryn aýyzsý jelisi bolmaǵan. Joba aıasynda uzyndyǵy 8 shaqyrymnan astam sý qubyry jelisi tartylyp, 106 aýla ortalyqtandyrylǵan aýyzsý júıesine qosyldy. Sonymen qatar kólemi 100 tekshe metr bolatyn eki rezervýar ornatyldy.
Oblys ákimi Bashkól aýylyndaǵy qaıta jańǵyrtylǵan sý qubyry jelisin de baryp kórdi. 420 turǵyny bar aýyldaǵy 1974 jyly salynǵan sý júıesi tolyq jańartylǵan. Joba aıasynda uzyndyǵy 9,781 shaqyrym sý qubyry jelisi qaıta jańǵyrtylyp, 111 aýla ortalyqtandyrylǵan sýmen qamtylǵan. Sondaı-aq Jylandy aýylyndaǵy sý berý stansasynyń jumysy da pysyqtaldy. Bul aýylda 355 adam turady. Munda da buryn aýyzsý jelisi bolmaǵan. Joba aıasynda uzyndyǵy 11 shaqyrym sý qubyry jelisi tartylyp, 132 aýla ortalyqtandyrylǵan aýyzsý júıesine qosyldy.
«Memleket basshysy Qasym-Jomart Toqaev halyqty sapaly aýyzsýmen qamtamasyz etý máselesine erekshe kóńil bólip keledi. Besqaraǵaı aýdanynyń Morozov orman sharýashylyǵy, Bashkól, Jylandy, Mostık, Kishi Vladımırovka aýyldaryna aýyzsý berildi. Bul jobalar turǵyndardyń turmys sapasyn jaqsartyp qana qoımaı, aýyldardyń odan ári damýyna tyń serpin beredi», dedi oblys ákimi.
Abaı oblysy,
Besqaraǵaı aýdany