Shyǵystyń qaı buryshy bolsyn, kenepti «kerip» jiberip, etıýd jazýǵa suranyp-aq tur. Syldyrap aqqan bulaq, kúrkirep aqqan ózen kóp. Altaıdy aıtpaǵannyń ózinde Naryn, Qalba jotalarynyń syńsyǵan ormany, tolqyǵan kólderi qanshama? Bul joly qylqalam sheberleriniń tańdaýy Ulannyń dalasyna tústi. Qalbanyń qojyr-qojyr silemderi men bel-belesin kenepke jazdy.
Plenerdi oblystyq óner mýzeıiniń basshylyǵy uıymdastyrdy. Mundaı dástúrli joba jylyna eki ret ótedi. Biri – jazdyń jaıma shýaǵynda bolsa, ekinshisi – kúzdiń mızam shýaǵy. Azdy-kópti sýretshilerdiń basy qosylatyn is-sharanyń biri de osy. Qylqalam ustaǵan óner ıeleri bir-birimen qaýyshyp, arqa-jarqa bolysady. Tis qaqqan sheberler jastarǵa jol kórsetip, baǵyttaıdy. Tabıǵat aıasyndaǵy bul jolǵy plener de solaı boldy.
– Jyl saıyn sýretshilerdi jınap, tabıǵat aıasyna shyǵyp turý burynnan kele jatqan dástúrimiz. Buǵan deıin Shyǵystyń birqatar aýdandarynan etıýd jazǵanbyz. Sóıtip, kórme ótkizemiz. Osy óner saparyna onnan astam kásibı sýretshi qatysty, – deıdi oblystyq óner mýzeıi dırektorynyń orynbasary Esenbol Naqtybaı.
Ulan aýdanynda ótip jatqan plenerge Erjan Turǵanbaev, Gúlnar Bekberdınova, Mádı Qaıyrhan, Danııar Aldabergenov, Ádilet Nııazbekov syndy tanymal qylqalam sheberleri qatysty. Olar ózderi tańdaǵan oryndarǵa jaıǵasyp, áp-sátte qos-qostan etıýd jazdy.
– Plenerdi sýretshiler qaýymy uzaq kútedi. Árıne, árkim óz betimen shyǵyp, etıýd jaza bere de alady. Alaıda bárimizdiń basymyz qosylyp, tájirıbe almasatyn alań osy. Sondyqtan budan da jıi uıymdastyrylyp tursa eken, – deıdi jas sýretshi Mádı Qaıyrhan.
Jıi shyqpasa da, eńbekteri eskerilse eken deımiz. Áıtpese, mádenıet qyzmetkerleri kúni marapattalyp jatqan óner maıtalmandarynyń ishinen birde-bir sýretshini kórmegen edik. Aldaǵy ýaqyttarda bul olqylyqtyń orny tolatyn shyǵar. Aıtqandaı, jumystardyń nátıjesin óner mýzeıi uıymdastyratyn kórmelerdiń birinen tamashalaı alamyz.
Shyǵys Qazaqstan oblysy,
Ulan aýdany