Kaspıı – Qazaqstandy saýda-sattyq, halyqaralyq tasymal turǵysynda álem elderine alyp shyǵatyn teńiz qaqpasy. Sý aıdynynyń qazaqstandyq sektorynyń qaýipsizdigin qamtamasyz etý úshin elimizdiń Áskerı-teńiz kúshteri bólimderi kúni-túni qyraǵy kúzette.
Atalmysh áskerı qurylym táýelsizdik merekesi qarsańynda zor jańalyqqa ıe boldy. Qazaqstan Áskerı-teńiz kúshteri tarıhynda alǵash ret Aqtaý teńiz-saýda porty aýmaǵynan áskerı aılaq ashyldy. Qurylys jumystary bıyl aqpan aıynda bastalǵan aılaqtyń uzyndyǵy 400 metrden asady, al qurylys jumystaryna 3 mıllıardtan astam teńge jumsalǵan.
Buǵan deıin áskerı kemeler Baýtın kentindegi aılaqty jaldamaly negizde paıdalanyp kelgen bolatyn. Áskerı bazadan 140 shaqyrym qashyqtyqta ornalasqan Baýtın aılaǵyna baryp qyzmet etý Aqtaý qalasynda turatyn áskerı qyzmetkerler úshin qolaısyzdyq týdyryp kelgen edi. Kemeler buryn tolyq áskerı daıyndyqqa kelý úshin alty saǵat ýaqyt kerek bolsa, endi nebári eki saǵatta saqadaı-saı bola alady. Sondaı-aq, Kaspıı teńiziniń qazaqstandyq sektorynda bolýy múmkin keleńsizdikterdiń der kezinde aldyn alýǵa, áskerı-tehnıkalyq qaýipsizdikti qamtamasyz etýge múmkindik týdyrdy. Oǵan qosa, bul Kaspıı teńiziniń qazaqstandyq sektoryndaǵy yqtımal keleńsizdikterdiń der kezinde aldyn alýǵa áskerı-tehnıkalyq qaýipsizdikti qamtamasyz etedi.
Qazaqstan Respýblıkasy Qarýly Kúshteri Áskerı-teńiz kúshteriniń bas qolbasshysy, vıse-admıral Jandarbek Janzaqovtyń aıtýynsha, áskerı teńizshiler bul turaqty on jyl kútken. Aılaqtyń jaqyn bolýy áskerı teńizshilerge qatysty áleýmettik máselelerge de oń áser etpek. Aıtýynsha, «Antares Platinum» JShS-niń jobalaýymen «Áskerı-Qurylys» AQ salǵan jobalyq qýaty 10 áskerı kemege arnalǵan aılaqta Qazaqstan Respýblıkasy UQK Shekara qyzmeti jaǵalaý kúzetiniń kemeleri de ornalaspaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy