Keshe «Samuryq-Qazyna» Ulttyq ál-aýqat qory» AQ enshiles uıymy «Samuryq-Qazyna Kontrakt» JShS uıymdastyrýymen satyp alý júıesi aqparattyq jumystarynyń tanystyrylymy ótti. Jıyndy mekemeniń atqarýshy dırektory Serikbek Elshibekov ashyp, sóz sóıledi.
Basqosý barysynda kompanııa atqarýshy dırektorynyń orynbasary Muhıt Maǵajanov satyp alý júıeleriniń jaı-kúıi jaıynda baıandady. «Bizdegi barlyq júıeler biryńǵaı nomenklatýralyq anyqtamalyqpen bekitilgen. Ol biz úshin óte mańyzdy. Sebebi, kóptegen memleketterde mundaı anyqtama joq, al bizde 160 myńǵa tarta kod jınaqtalǵan. Árbir satyp alatyn taýardyń, qyzmettiń nemese jumystyń ózderine tıesili kodtary bar. Satyp alýlardyń barlyǵy sol sandar arqyly júzege asyrylady. Endi osy satyp alýlardyń barlyǵy bir elektrondy júıede júrgiziledi», dedi M.Maǵajanov. Onyń aıtýynsha, «Samuryq-Qazyna» UQ» AQ-qa tıesili 250-ge jýyq kompanııa satyp alýlaryn osy elektrondy júıede iske asyrady. Bul barlyq kásipkerlerge óte yńǵaıly jáne ońtaılandyrylǵan. Sebebi, qujattar bir júıe arqyly qabyldanady, eshqaıda barýdyń qajeti joq, ýaqytty únemdeıdi. Satyp alý elektrondy tásilmen júrgiziledi.
«Biz 2009 jyldan bastap Prezıdenttiń bastamasymen arnaıy zań qabyldanyp, memlekettik satyp alýdan bosatylǵanbyz. Nege deseńiz, enshiles kompanııalarymyzdyń barlyǵy derlik óndiriske jaqyn. Árbir mekemeniń maqsaty – kóbirek paıda tabý, bıýdjetke kóp salyq tóleý. О́zderińiz biletindeı, álemdegi eń úzdik tájirıbeni jınap, jańa qaǵıdany jasadyq. Munda negizinen Ońtústik Koreıanyń tájirıbesin basshylyqqa alýdamyz. Durysynda, «Samuryq-Qazyna» elektrondy júıege úsh jyl buryn ótip qoıǵan. Búginde bir orynda turmaı, tek solardy jańartý ústindemiz», deıdi kompanııa atqarýshy dırektorynyń orynbasary.
Sharada «Samuryq-Qazyna Kelisim-shart» JShS ashyq jumys toby satyp alý júıesindegi jetildirilgen elektrondy júıeniń artyqshylyqtaryn jan-jaqty túsindirip, talqylady. Mamandar usynystar men saýaldarǵa da keńinen jaýap berdi.
Ashat RAIQUL,
«Egemen Qazaqstan»