Almaty oblysynda 300 oryndyq jańa mektep ashyldy. Qarasaı aýdanynyń Úshterek aýylynda paıdalanýǵa berilgen nysan «Nurly jol» baǵdarlamasy aıasynda boı kóterdi.
Jańa mekteptiń qurylysyna ulttyq qordan jáne jergilikti bıýdjetten 897 mln teńge qarjy bólindi. Aıta keteıik, buǵan deıin Úshterek aýylynda bastaýysh mektep qana bolǵan. Onyń ózinde oqýshylar úsh aýysymmen oqyp, al joǵary synyptaǵylar kórshi Úshqońyr aýylyna baryp bilim alatyn. Endi jańa zamanaýı mektepte oqýshylardyń tolyqqandy bilim alýyna jaǵdaı bar, deıdi mektep dırektory Anar Aıdynbaeva.
«4 lıngafondyq-mýltımedııalyq kabınet, 100 adamǵa arnalǵan ashana, 72 oryndyq májilis zaly, fızıka, hımııa, ınformatıka jáne sport zaly bar. Jalpy jańa mekteptiń aýmaǵy 5236 sharshy metr», – deıdi A.Aıdynbaeva. Atalǵan nysannyń qurylysy 2015 jyldyń naýryz aıynda bastalǵan. Jańa jyl qarsańynda paıdalanýǵa berilgen bilim ordasynyń ashylýyna oblys ákiminiń orynbasary Ǵalymjan Ábdiraıymov qatysty.