«Kolýmbııanyń revolıýsııashyl qarýly kúshteriniń» jetekshisi Rodrıgo Londono Echeverrı men osy eldiń prezıdenti Hýan Manýel Santos jańa beıbit kelisimge qol qoıdy. Saltanatty rásim memleket astanasy Bogota qalasynda ótti. Oǵan birqatar eldiń basshylary men BUU-nyń Bas hatshysy qatysty, dep habarlady lenta.ru.
Jarty ǵasyrdan astam ýaqytqa sozylǵan qaqtyǵysqa shek qoıatyn qujatty kelesi aptada Kolýmbııa kongresi ratıfıkasııalaıdy. Buǵan sáıkes, kóterilisshiler qarýyn tastap, saıası partııa qurady. Negizi taraptar qyrkúıektiń aıaǵynda osyndaı beıbit kelisimdi bekitken bolatyn.
Biraq, ótkizilgen referendýmda halyqtyń basym bóligi qarsy daýys berdi. Turǵyndar búlikshilerdi jazaǵa tartýdy talap etip, ereýilder uıymdastyrǵan.
Esterińizge sala keteıik, Kolýmbııada azamattyq soǵys 1964 jyly bastalǵan bolatyn. Qaqtyǵystardyń saldarynan búginge deıin 220 myńnan astam adam qaza taýyp, taǵy 6 mıllıonǵa jýyǵy úılerin tastap ketýge májbúr boldy.