Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamaly maqalasyna arnalǵan forýmnyń ashylý saltanatyna Qazaqstan Respýblıkasynyń Memlekettik hatshysy Gúlshara Ábdiqalyqova men BUU, IýNESKO, ISESESKO, ECO Sience foundation, Túrki keńesi, TÚRKSOI, TúrkPA syndy halyqaralyq uıym basshylary men ókilderi qatysty.
Ashylý saltanatynda sóz alǵan halyqaralyq Túrki akademııasynyń basshysy Darhan Qydyráli túrki halyqtary dástúrli mádenıetin jańǵyrtý maqsatynda ótip jatqan forýmnyń mańyzdylyǵyna toqtalyp, forým jumysyna sáttilik tiledi.
«Túrki akademııasynyń qurylǵanyna týra jeti jyl tolyp otyr. Qurmetti forým qatysýshylary, ekinshi ret uıymdastyrylyp otyrǵan alqaly jıynǵa qosh keldińizder. Qazaqstan Prezıdentiniń taıaýda jaryq kórgen maqalasynda atap kórsetkendeı, bilim, sana bolýy tıis. Ol arqyly biz jadymyzdy jańǵyrtyp, ótken bolashaǵymyz ben jasampaz bolashaǵymyzdy jarasymdy úılestire alamyz. Osyǵan baılanysty biz bıylǵy forýmdy Elbasynyń «Bolashaqqa baǵdar: rýhanı jańǵyrý» maqalasyna arnap otyrmyz. Jıyn barysynda mándi baıandamalar men utymdy usynystar aıtylady dep oılaımyz. Alqaly jıynǵa arnaıy kelgen barshańyzǵa rahmetimizdi aıtamyz», – dedi akademııa basshysy.
Jıyndy ashqan Memlekettik hatshy Gúlshara Ábdiqalyqova álem órkenıetindegi Túrki mádenı murasyn aıshyqtaýda álem ǵalymdary bas qosqan forýmda kóteriletin mindetter men taqyryptar aýqymdylyǵy týrasynda aıtyp ótti.
«Astanada álemniń jıyrmaǵa jýyq elinen kelgen ǵalymdar bas qosyp, osymen ekinshi ret uıymdastyrylyp otyrǵan «Uly dala» ekinshi gýmanıtarlyq ǵylymı forýmyna qosh keldińizder. Bas qalamyzdyń ǵylymı jáne ıntellektýaldyq ortalyq retinde ıgi yqpalyn tıgizip otyrǵan ǵylymı forým qordalanǵan ǵylymı máselelerdi sheshýde tyń konseptýaldy sheshimder beretinine senimdimin», – degen ol Memleket basshysy Nursultan Ábishulynyń forým jumysyna sáttilik tilegen quttyqtaý hatyn oqyp berdi. «Sizderdiń barshańyzdy «Uly dala» II gýmanıtarlyq ǵylymdar forýmynyń ashylýymen quttyqtaımyn. Eýrazııa keńistigin kernegen halyqtardyń myńjyldyq baılanystarynyń shejiresi, Batys jáne Shyǵys órkenıetterin toǵystyrǵan toǵyz joldyń toraby. Onyń geografııalyq aýqymy alys kókjıekterdi qamtıdy, tarıhı damýlary tereńnen quralady. Baı mádenı murasy búkil adamzattyń ortaq ıgiligi. Meniń bastamam boıynsha qurylǵan halyqaralyq Túrki akademııasy ekinshi márte mundaı formattaǵy alqaly jıynnyń ótýine uıytqy bolyp, rýhanı jańǵyrý máselesin qolǵa alyp otyr. Bul forým qurlyqtardy shekarasyz jalǵaǵan ǵylymı ıntegrasııaǵa úlken serpin beredi dep senemin», delingen quttyqtaý hatta.
AQSh, Vengrııa, Germanııa, Qytaı, Mońǵolııa, Ońtústik Koreıa, Úndistan, Reseı men túrki memleketterinen kelgen 200-ge jýyq ǵalym-zertteýshi men sarapshylar alty paneldi otyrysta mazmundy baıandamalar jasap, Elbasy maqalasynda kóterilgen mindetter men taqyryptar tóńireginde paıymdy pikirlerin ortaǵa saldy. Sonymen birge, forým aıasynda TWESCO Túrki álemi ǵylymyna sińirgen eren eńbegi men baýyrlas halyqtar arasyndaǵy yntymaqtastyqty damytýǵa qosqan úlesi úshin kórnekti memleket jáne qoǵam qaıratkeri, akademık Myrzataı Joldasbekuly, tanymal ǵalym, Tatarstan Respýblıkasynyń qoǵam qaıratkeri Mırfatyh Zakıevti altyn medaldarmen marapattady. Budan bólek, shara barysynda TWESCO sońǵy jyldary shyǵarǵan kitaptar kórmesin uıymdastyrdy.
Aıa О́MIRTAI, «Egemen Qazaqstan».