Manıtoba provınsııasynyń astanasy Vınnıpeg qalasynda ótken is-sharaǵa Qazaqstan Respýblıkasynyń Kanadadaǵy elshisi Konstantın Jıgalov, Manıtoba Mádenıet mınıstri Roshel Skvaıers, Qarjy mınıstri Kameron Frızen, provınsııa Parlamentiniń depýtattary jáne shamamen 400-deı qoǵam qaıratkeri qatysty.
Qatysýshylardyń aldynda sóılegen sózinde K.Jıgalov kitap avtoryn Qazaqstannyń tarıhy men mádenıetin sáýlet turǵysynan zerttegen ǵylymı jobanyń sátti aıaqtalýymen quttyqtaı kelip, Kanada tarıhynda Qazaqstanǵa arnalǵan alǵashqy kitaptyń 2017 jyly basyp shyǵarylýynyń erekshe mańyzyn atap ótti. «Bıylǵy jyly Qazaqstan men Kanada arasyndaǵy dıplomatııalyq qarym-qatynastarǵa − 25 jyl, Prezıdent N.Á.Nazarbaev bas arhıtektory bolyp sanalatyn Astana qalasynyń elorda bolýyna 20 jyl tolyp otyr. Bul kitap EKSPO-2017 halyqaralyq mamandandyrylǵan kórmesiniń ashylýy qarsańynda jaryq kórýde. Professor Frank Albo kitaptyń jeke bóligin soǵan arnap otyrǵany belgili», – dedi K.Jıgalov. Sonymen qatar, Qazaqstan elshisi tyńdaýshylardy elimizdiń áleýmettik-ekonomıkalyq damýy, sondaı-aq, elimizdiń jańǵyrtylýynyń basty qadamdary týraly jan-jaqty habardar etti. Memleket basshysynyń bastamasymen iske asyrylyp jatqan qoǵamdyq sanany jańǵyrtý jáne «Týǵan jer» baǵdarlamasy aıasyndaǵy «Qazaqstannyń kıeli jerleri» jobasyn eskere otyryp, avtor kótergen taqyryptardyń ózektiligine de erekshe nazar aýdardy. Kanada jurtshylyǵy «Astana: sáýleti, jumbaǵy, taǵdyry» kitabyna qyzyǵýshylyq tanytyp, qazirgi kezde onyń alǵashqy tırajy (4500 dana) tolyǵymen satyldy. Kitap Kanadanyń resmı bestselleri ataǵyna ıe boldy. F.Albo is-sharaǵa jınaǵan jurtshylyqty kitaptyń resmı saıty (www.astanamyth.com), «ATOM» jobasymen birge iske asyrylyp jatqan ıadrolyq qarýǵa tyıym salý jónindegi onlaın naýqan, sondaı-aq, aldaǵy ýaqytta London, Vashıngton, Ottava qalalarynda jáne Astanadaǵy EKSPO-2017 kórmesi sheńberinde arnaıy tusaýkeser uıymdastyrý týraly óz josparlarymen tanystyrdy, dep habarlady elimizdiń Syrtqy ister mınıstrliginiń baspasóz qyzmeti.