Is-shara Qazaqstan Parlamenti Senaty Tóraǵasynyń orynbasary Sergeı Gromov pen Reseı Federaldyq Jınalysy Federasııa Keńesiniń Tóraǵasynyń orynbasary Ilıas Ýmahanov tóraǵalyq etti. Komıssııa eki eldiń joǵary zań shyǵarýshy organdarynyń joǵarǵy palatalary arasyndaǵy Yntymaqtastyq týraly kelisimniń negizinde áreket etedi.
Keńesti asha otyryp, Sergeı Gromov Komıssııanyń sońǵy toǵyz jyldaǵy otyrystary óziniń tıimdiligin kórsetti, dep atap ótti. «Parlamenttik yntymaqtastyqtyń jańa deńgeıine qol jetkizildi. Biryńǵaı ekonomıkalyq keńistik aıasynda bizdiń elderimizdiń zańdaryn úılestirý maqsatynda aýqymdy ister atqaryldy, - dedi Senaty Tóraǵasynyń orynbasary.
Otyrystyń kún tártibi aıasynda Biryńǵaı ekonomıkalyq keńistik sheńberinde Qazaqstan Respýblıkasy men Reseı Federasııasy arasyndaǵy transshekaralyq aımaqtardyń (Atyraý oblysy men Astrahan oblysynyń) damýy, transshekaralyq Oral ózeni basseıniniń ekojúıesin saqtaý men bilim salasyndaǵy yntymaqtastyq máseleleleri talqylandy.
Sonymen qatar, parlamentshiler Komıssııasynyń 2016 jylǵy 25 qarashada Sankt-Peterbýrg qalasynda ótken toǵyzynshy otyrysy sheshimderiniń iske asýy barysyn, sondaı-aq, Qazaqstan Respýblıkasy Parlamenti Senaty men Reseı Federasııasy Federaldy Jınalysy Federasııa Keńesiniń arasyndaǵy Yntymaqtastyq jónindegi komıssııanyń on birinshi sessııasynyń daıyndyq máselelerin qarady.
Qazaqstan tarapynan komıssııanyń jumysyna Atyraý oblysynyń ákimi Nurlan Noǵaev, senatorlar: Sergeı Plotnıkov, Serik Bekturǵanov, Sársenbaı Eńsegenov, Jeńis Nurǵalıev, Olga Perepechına, sondaı-aq, energetıka, bilim jáne ǵylym mınıstrlikteriniń ókilderi qatysty.
Komıssııanyń kelesi kezekti, on birinshi otyrysy Reseıde ótetin bolyp josparlanǵan.