Qaraǵandy memlekettik medısınalyq ýnıversıtetiniń shaqyrtýymen óńirge sheberlik synybyn ótkizý úshin Kúnshyǵys elindegi Sımane ýnıversıtetiniń professory Ioshıhıro Noso keldi.
Ýnıversıtettiń medısınalyq ortalyǵynda «Hırýrgııa jáne onkologııadaǵy ınnovasııalyq tehnologııalar» taqyrybynda ótken sheberlik-synybyna ıntern-dárigerler men hırýrgııa salasynyń rezıdentteri qatysty.
Búginde laparoskopııalyq otalar 3D rejimde eń jańa sheteldik qurylǵylarmen jasalýda.
– 3D ekrany bar, ish qurylysynyń aýqymdy beınesin kórsetetin tehnologııa kez kelgen klınıkada bola bermeıdi. Men sizderdiń qurylǵylaryńyzǵa tań qalyp otyrmyn, medısınalyq ortalyqtaryńyz óte jaqsy jabdyqtalǵan, – dep baǵalady jergilikti ortalyqpen tanysqan Ioshıhıro Noso.
Jańa tehnologııalar medısına qyzmetkerleriniń múmkindikterin keńeıtip otyr.
– Laparoskopııalyq otalardyń belgili shekteýleri bolady, biz operasııa barysynda organdardyń qanshalyqty tereń ornalasqanyn kóre almaımyz. Al 3D rejim nemese stereo-rejim bul kemshilikti joıady dep aıtýǵa bolady, – dedi QMMÝ № 2 hırýrgııalyq aýrýlar kafedrasynyń meńgerýshisi Ermek Turǵunov.
Mıras ASAN,
«Egemen Qazaqstan»
QARAǴANDY