Rıdder metallýrgııa kesheninde kompanııanyń mereıtoıy qurmetine myrysh qatqabattarynan aýmaǵy toqsan sharshy metrdeı bolatyn kólemdi sandar jasaldy. «Kazsınk» JShS-niń jurtshylyqpen baılanys basqarmasy osylaı dep habarlady.
Metallýrgııa óndirisiniń jumyskerleri óz kompanııasynyń aıtýly merekesi – jıyrma jyldyǵy eshkimge uqsamaıtyndaı etip biregeı túrde quttyqtaýdy uıǵarypty. Olar keshen aýmaǵynda ózgeshe quttyqtaý ınstallıasııasyn ornatty.
– Biz ózimizdiń súıikti kompanııamyz – «Kazsınk» jıyrmaǵa tolǵan jyly «qarapaıym» ǵana kádesyı jasadyq, – deıdi keshen qyzmetkerleri. – 85 myrysh qatqabatynan nemese 4 590 quımasynan alyp sıfrlar «qalap shyqtyq». Alyp kompanııaǵa – alyp syılyq! Jumys kezinde birde-bir quıma búlingen joq.
Úlken sıfrdy jasaǵan kezde tórt elektr tıegish paıdalanylypty, olardy óz mamandyǵynyń sheberleri – Baýyrjan Qarjaýbaev, Danıl Ivannıkov, Erasyl Orazaev, Sergeı Konıýhov basqarǵan kórinedi. «Quttyqtaý» alańy – 90 sharshy metrdeı. Al onyń jalpy salmaǵy – 100 tonnaǵa jýyq.
Azamat QASYM,
«Egemen Qazaqstan»
RIDDER