Sol kún oblys ortalyǵyndaǵy S.Toraıǵyrov atyndaǵy memlekettik ýnıversıtettiń bıylǵy túlegi Rımma Kovaleva úshin eń qýanyshty, eń bir umytylmas sát bolǵany anyq.
Qazir shetelderdegideı bizdiń elimizde de kásipkerlikti stýdenttik aýdıtorııadan bastaý jobasy júzege asyrylyp jatyr. Rımma da solaı stýdent kezinen qoldan kóbelek-galstýkter jasady. Bárimizge belgili, galstýk qaı ýaqytta bolsyn er adamnyń garderobyndaǵy eń sándi aksessýar. Ártúrli úlgileri bar. Mysaly, kóbelek-galstýkti sándik maqsatta smokıngpen nemese frakpen taǵady. Al Rımma Kovaleva óziniń zamandastaryna úlgi kórsetýde. Ol ýnıversıtet qabyrǵasynda júrip-aq jeke kásipkerlik jolyn bastady. О́z qolymen jasaǵan brendtik galstýkterin «Rimmini» atalatyn saýda belgisimen satýdy qolǵa aldy.
Týrızm jáne dızaıner salasy boıynsha bilim alǵan Rımma stýdent kezden-aq oqý ornynyń jumysyna belsene aralasty. Oqytýshylarynyń aıtýynsha, 1-kýrstan bastap Start-up akademııa kýrstaryna qatysyp, ózin jaqsy qyrynan tanyta bilipti.
Áli esimizde, 2016 jyly qyrkúıek aıynda Elbasy Nursultan Nazarbaev oblysymyzǵa saparmen kelgende, S.Toraıǵyrov atyndaǵy ýnıversıtettiń Startap akademııasynda «Stýdenttik kásipkerlik jobalardyń» tusaýkeser rásimine qatysty. Saltanatty shara kezinde kútpegen jaǵdaı boldy. Rımma Kovaleva Elbasyna eki kóbelek-galstýk syıǵa tartty.
– Qatty qýandym, Prezıdent birden qolyna alyp, ólshep kórdi. Bireýi – altyn tústes bıser jyltyraqpen ulttyq stılde jasalǵan. Ekinshisi, saltanatty qabyldaýlarǵa arnalǵan qara tústi. Elbasyna usynǵan tartýym óte unady, qyzyǵa qarap kórdi. Memleket basshysynyń qarapaıymdylyǵyna tańǵaldym, – deıdi Rımma.
Ýnıversıtettiń Startap akademııasynda bolǵan osy kezdesýinde Elbasy «Qazirgi ýaqytta memleket bıznesti damytý úshin barlyq qajetti jaǵdaıdy jasap otyr. Álemniń kóptegen elinde jastarǵa stýdent kezinde óziniń startap-jobasyn bastap, joǵary oqý ornyn bitirgende birtalaı jetistikke jetýge múmkindik beretin tájirıbeler bar. Mundaı jaǵdaı elimizdiń ózge óńirlerindegi joǵary oqý oryndarynyń stýdentteri úshin de jasalýǵa tıis», degen bolatyn-dy.
Jastaıynan kásipkerlikke beıimdelgen Rımma úshin bir galstýk jasaýǵa 40 mınýttaı, jyltyraqpen, basqa da kúrdeli túrlerin jasaý kerek bolsa, budan kóbirek ýaqyt qajet bolady. Tóltýma taýarlaryn 2 myń teńgeden 10 myń teńgege deıingi aralyqta baǵalaǵan. Matany ınternet arqyly tapsyrys berip, Norvegııadan satyp alyp júrdi. Stýdent kezinde 800-deı «kóbelek» satypty.
Árıne árbir stýdent Start-up jobasyna qosylar aldynda oılanady. Rımma da sóıtti. Kóbelekterin jasaýdan buryn, dızaınerlik bıýro qurdy, qolmen jasalatyn buıymyn kesip-piship shyǵaratyn sheberhana kerek boldy. Kóbelek eni boıynsha jaǵa shetinen asyp ketpeýi tıis. Basqa da oılanatyn jaılary barshylyq. Sóıtip tańǵalarlyq qyzyqty bir joba ómirge keldi7
Elbasy aıtqandaı, osyndaı stýdenttik startap jobalar aýdıtorııadan kásipkerlikke aparatyn baspaldaq. Mysaly, «Rimminidiń» brendtik galstýkterin áleýmettik jelilerden satyp ala alasyz. Sondyqtan Reseıden bastap, barlyq TMD elderi, Norvegııa, Italııa, Fransııa, Germanııa, tipti Malaızııa, Sıngapýrde de Rımmanyń «kóbelekteri» «ushyp» júr. Tapsyrystardyń árıne jóni bólek, «kóbelekterin» syılaıtyn dostary da óte kóp eken. Eń bastysy, «Rimmini» «kóbelekterin» taǵyp júrgen erler az emes. Stýdent qyz «kóbelekterin» aqsha tabý úshin emes, adamdarǵa qýanysh, kóńil-kúı, baqyt syılaý úshin jasaıtynyn aıtady.
Rımma Kovaleva bıyl oqýyn bitirdi. Qazir shetelde óz bilimi men biliktiligin shyńdaýda, tájirıbe jınaqtap, kásibin jalǵastyrýda. Osy jetistikke jetýge múmkindik bergen Elbasynyń bir aýyz sózi Rımmanyń armanyna qanat bitirgen edi. Iske, sát, Rımma!
Farıda BYQAI, «Egemen Qazaqstan»
PAVLODAR