Búgin Úkimet basshysynyń orynbasary Asqar Jumaǵalıev Almaty oblysynyń Panfılov aýdanyna jumys saparymen kelip, «Qorǵas-Shyǵys qaqpasy» arnaıy ekonomıkalyq aımaǵynyń tynys-tirshiligimen tanysty.
Premer-mınıstrdiń orynbasary aldymen «Altynkól» temirjol beketi men osynda ornalasqan kedendik resimdeý ortalyǵynda bolyp, halyqaralyq júk tasymaly men tekserý-baqylaý jumystaryna kýá boldy. Mundaǵy qyzmet kórsetý tolyqtaı sıfrly júıege kóshken. Bul óz kezeginde tranzıt kólemin arttyryp, elaralyq taýar tasymaldaýdyń deńgeıin jańa sapaǵa kóterdi. Buryndary tek temirjoldaǵy tekserý jumysyna jarty kún ketetin bolsa, avtomattandyrý nátıjesinde kez kelgen júkti daıyndap jóneltýge 4 saǵattaı ǵana ýaqyt jetkilikti eken.
- Keden beketindegi qyzmet kórsetý de sıfrlyq tehnologııanyń enýimen jyldam ári sapaly bola tústi. Qazir júk tasymaldaýshylar úshin barlyk jaǵdaı jasalýda. Deklarasııa toltyrý, kedendik tekserý, tasymaldaýǵa ruhsat berý úrdisi tolyqtaı sıfrlyq júıege kóshti. Kedendegi kedergi azaıyp, júk ótkizý kóbeıdi. Azamattar men kompanııa ókilderi elektrondy qyzmet kórsetý barysyn baqylap otyrýǵa múmkindik aldy,-dedi ortalyqtyń jumysymen tanystyrǵan Memlekettik kirister komıteti tóraǵasynyń orynbasary Ǵosman Ámrın.
Sondaı-aq Asqar Jumaǵalıev arnaıy ekonomıkalyq aımaqta qurlysy bastalǵan «Nur joly» kedendik baqylaý beketindegi jumystardy kórip, Qurǵaq port jobasy aıasynda atqarylǵan is barysymen tanysty.
Qalmahanbet Muqametqalı,
«Egemen Qazaqstan»
Almaty oblysy