Jyl sońyna deıin Shyǵys Qazaqstanda bes áleýmettik-mádenı nysan paıdalanýǵa berilmek. Qazir О́skemendegi Ahat Kúlenov kentinde ornalasqan ǵımaratty bir aýysymda 212 adamǵa qyzmet kórsetetin emhanaǵa aınaldyrý boıynsha qaıta jóndeý jumystary qyzý júrip jatyr.
Oblys ákimi baspasóz qyzmetiniń taratqan málimetterine súıensek, qurylys jumystarynyń 90 paıyzy aıaqtalǵan nysan bıylǵy kóktemde esigin aıqara ashýy tıis. Sonymen qatar osy jyldyń qyrkúıek aıynda Abaı aýdanynda uzyndyǵy 25 metr bolatyn bes jolaqty júzý basseıni jumysyn bastamaq.
Taǵy bir jaǵymdy jańalyq, bıyl óńirdiń úsh birdeı aýdanynda jańa bilim ordalary (Aıagóz aýdanynda 600, Úrjar aýdanynyń Maqanshy aýylynda 320 jáne Tarbaǵataı aýdanynyń Aqjar aýylynda 600 oryndyq mektep, 300 oryndyq ınternat) boı kótermek. Aımaq basshysy Danıal Ahmetov jaqynda О́skemende ótken jıyndardyń birinde atalǵan úsh nysandy jańa oqý jyly bastalǵanǵa deıin qoldanysqa berýdi tapsyrǵan bolatyn.
Qazirgi ýaqytta oblysta bes áleýmettik-mádenı, sporttyq nysannyń qurylysy júrip jatqany belgili. Olar О́skemende salynyp jatqan úsh mektep pen densaýlyq saqtaý salasyndaǵy eki nysan (gematologııalyq ortalyq pen О́skemen qalasyndaǵy 200 oryndyq qalalyq balalar aýrýhanasynyń qurylysy). Sondaı-aq Semeı qalasynda «Abaı-Arena» mádenı-sport kesheni salynady. Halyqaralyq standarttarǵa saı keletin, bes myń orynǵa shaqtalǵan ǵımarat Qaraǵaıly yqsham aýdanynda boı kótermek.
Azamat QASYM, «Egemen Qazaqstan»
Shyǵys Qazaqstan oblysy