Fýtboldan 2026 jylǵy álem chempıonatynyń toptyq kezeńi aıasynda 15 maýsym kúni tórt kezdesý josparlanǵan. Týrnır kestesine sáıkes búgin Ispanııa Kabo-Verde quramasymen kezdesedi, dep habarlaıdy Egemen.kz.
Alǵashqy oıyn 01:00-de F tobyndaǵy Nıderland pen Japonııa quramalary arasynda ótti. AQSh-tyń Arlıngton qalasyndaǵy AT&T Stadium stadıonynda ótken kezdesý 2:2 esebimen aıaqtaldy.
04:00-de Kot-d’Ivýar men Ekvador quramalary kezdesti. G tobyndaǵy oıyn 1:0 esebimen afrıkalyq komandanyń paıdasyna sheshildi.
Al 07:00-de ótken Shvesııa men Týnıs arasyndaǵy oıynda eýropalyqtar basym tústi. Grem Potterdiń shákirtteri qarsylas qaqpasyna 5 gol soqsa, Týnıs tek bir golmen jaýap berdi. Match 5:1 esebimen aıaqtaldy.
Búgin saǵat 21:00-de H tobyndaǵy Ispanııa men Kabo-Verde quramalary kezdesedi. AQSh-tyń Atlanta qalasynda ótetin oıynda ıordanııalyq maman Adham Mohammad tórelik etedi.
H tobynda Ispanııa men Kabo-Verdeden bólek Saýd Arabııasy men Ýrýgvaı quramalary da óner kórsetedi.
Aıta keteıik, Ispanııa quramasy álem chempıonatyna 17 ret qatysyp, 2010 jyly chempıon atanǵan. Sońǵy jyldary komanda iri týrnırlerde turaqty nátıje kórsetip keledi. 2024 jyly Lýıs de la Fýente baptaǵan qurama Eýropa chempıonatyn jeńip alǵan bolatyn.
Al Kabo-Verde quramasy álem chempıonatyna alǵash ret qatysyp otyr. Afrıkalyq komanda irikteý kezeńinde Kamerýndy artta qaldyryp, sensasııalyq túrde joldama aldy.
Eske sala keteıik, fýtboldan XXIII Álem chempıonatynyń matchtaryn «Qazaqstan» jáne «Qazsport» telearnalary tikeleı efırde kórsetedi. Sonymen qatar oıyndar qazaqstan.tv, qazsporttv.kz resmı saıttarynda, «Qazaqstan.tv» mobıldi qosymshasynda jáne «Birge.tv» platformasynda onlaın formatta qoljetimdi bolady.