Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyn nasıhattaý jónindegi Ishki ister mınıstri Q.Qasymov bastaǵan respýblıkalyq aqparattyq top Qyzylorda oblysynda óz jumysyn bastady.
Qalmuhanbet Qasymov birinshi kezekte Elbasy Joldaýynyń negizgi mindetteri talqylanǵan oblys ákimi Qyrymbek Kósherbaevtyń halyqqa esep berý kezdesýine qatysty.
Túsindirý jumystary sheńberinde ótkizilgen oblys aktıvimen kezdesý barysynda mınıstr basty qujatta kórsetilgen negizgi basym baǵyttarǵa sıpattama berip, alǵa qoıǵan maqsattardy iske asyrý boıynsha el Úkimeti qabyldap jatqan sharalar týraly áńgimeledi. Kezdesýde zamanaýı quqyqtyq jáne qaýipsiz qoǵam qurý máselelerine basa nazar aýdaryldy.
Budan soń Q.Qasymov azamattarǵa jeke qabyldaý ótkizip, óńir turǵyndarynyń naqty máselelerimen tanysty, sonymen birge azamattardy alańdatqan máselelerdi jedel sheshý jóninde tapsyrma berdi.
Sapar barysynda mınıstr ishki ister, tótenshe jaǵdaılar jáne qylmystyq atqarý júıesi departamentteriniń jeke quramymen kezdesti. Bul kezdesýde Q.Qasymov Joldaýdan týyndaıtyn mindetterdi iske asyrý úshin ishki ister organdary qabyldaıtyn negizgi sharalarǵa naqtyraq toqtalyp, basym baǵyttardy pysyqtady.
«Qazirgi zaman talaptaryna saı bolý úshin Prezıdent N.Á.Nazarbaevtyń Qazaqstan halqyna Joldaýy ishki ister organdary qyzmetin jańǵyrtýǵa jáne tehnologııalyq damýyna jańa serpin berýi tıis», dep atap ótti Ishki ister mınıstri.
Kelesi kezekte Q. Qasymov jergilikti polısııa qyzmetiniń, kezekshi bólimniń jáne qajetti quraldarmen qamtamasyz etilgen kóshpeli polısııa beketiniń jumysymen tanysty. Mınıstr ǵımaraty tolyq qaıta qurastyrýdan ótken qylmystyq-atqarý júıesiniń mekemesinde boldy. Munda burynǵy japsyrmalap salynǵan úı-jaıdyń ornyna halyqaralyq standarttarǵa sáıkes sottalǵandardy kameralar boıynsha ustaýǵa arnalǵan jataqhanalar turǵyzylǵan. Sonymen birge mınıstr sottalǵandardyń kásiptik bilim alýy jáne óńirdiń bıznes qurylymdaryn tarta otyryp, qosymsha jumys oryndaryn qurý máselelerin talqylady.
Mınıstr nazaryna IID oqý-jattyǵý ortalyǵynyń, Jalaǵash AIIB jáne Aral aýdanyndaǵy Sekseýil polısııa bólimi qurylystarynyń jobalary usynyldy.
Sonymen qatar Q. Qasymov ótken jyly respýblıka boıynsha uıymdastyrylǵan slettiń jeńimpazdary bolǵan jol qozǵalysynyń jas ınspektorlarymen kezdesip, olarǵa jol qaýipsizdigi erejelerin jetik ıgergenderi úshin alǵysyn bildirdi.
«Egemen-aqparat»