Memlekettik qyzmet isteri jáne sybaılas jemqorlyqqa qarsy is-qımyl agenttiginiń uıymdastyrýymen jáne Almaty qalasy ákimdigi jáne ál-Farabı atyndaǵy QazUÝ-diń qoldaýymen ótken joǵary oqý oryndarynyń «Sanaly urpaq – jarqyn bolashaq» atty respýblıkalyq forýmynda bilim salasyndaǵy jemqorlyqqa qarsy is-qımyldyń ózekti máseleleri talqylandy.
Jemqorlyq – búkil qoǵam bolyp kúresetin qaýipti indet. Agenttik tóraǵasy Alık Shpekbaev óziniń sózinde elimizde jemqorlyq deńgeıiniń tómendeýine qaramastan, bilim júıesinde jemqorlyq qaýpiniń bar ekenin aıtty. Bilim jáne ǵylym granttaryn bólý, bıýdjet qarjysyn ıgerý, basshy quramdy irikteý, bilim berý uıymdary qyzmetkerleriniń kategorııasy men júktemesin anyqtaý jumystary ashyq júrgizilmeıdi, jemqorlyq qaýpin anyqtaý júıesi men saraptama jasaý joqtyń qasy, jemqorlyqqa jol bergen qyzmetkerleri úshin basshylar jeke jaýapkershilikke tartylmaıdy.
«Búgingi kúni elimizdiń túbegeıli jańarýy jaǵdaıynda adamı kapıtaldy damytý mindeti aldyńǵy orynǵa shyǵýda, óıtkeni ol Qazaqstannyń álemniń básekege qabiletti memleketter qataryna enýinde mańyzdy shart bolyp tabylady. Memleket basshysynyń qoldaýynyń arqasynda sońǵy 15 jyl ishinde bilim salasyna jumsalǵan qarjy 10 ese artty. Osy jyldar ishinde Qazaqstan halyqaralyq bilim keńistigine batyl ene tústi. Degenmen, bilim salasy jemqorlyq qaýpine tym beıim bolyp otyr. Biz jemqorlyqty joıý sharalary kópshiliktiń, sonyń ishinde bilim salasyndaǵy adamdardyń qoldaýyna ıe bolady degen senimdemiz», dedi A.Shpekbaev.
О́z kezeginde Almaty qalasynyń ákimi Baýyrjan Baıbek memlekettik organdardyń ashyqtyǵy, esep berýi, tazalyǵy barysynda jáne olardyń azamattyq qoǵammen belsendi yntymaqtastyǵy jaǵdaıynda ǵana jemqorlyqqa qarsy sharalardyń tıimdiligi artatynyn atap ótti.
«Qazirgi kezde elimizde jemqorlyqqa qarsy is-qımyldyń barlyq quqyqtyq quraldary jasalǵan. Memleket basshysynyń Jarlyǵymen Qazaqstan Respýblıkasynyń Jemqorlyqqa qarsy strategııasy bekitilgen, «Jemqorlyqqa qarsy is-qımyl týraly», «Qoǵamdyq keńes týraly», «Aqparattyń qoljetimdiligi týraly» sııaqty mańyzdy zańdar qabyldanǵan. Bizdiń ortaq mindetimiz – jemqorlyqty múldem qabyldamaıtyn ashyq oılaýdy, quqyqtyq jáne qarjylyq mádenıetti qalyptastyrý, turmystyq jemqorlyqty joıý. Memlekettik organdarǵa kelgen árbir jan keıde keleńsizdikke tap bolady. Mundaı jaısyz jaǵdaı bilim berý, densaýlyq saqtaý mekemeleri nemese quqyq qorǵaý organdarynda kezdesýi múmkin. Sondyqtan bıyl ákimdiktiń barynsha kókeıkesti 10 qyzmeti «paper-free» qaǵıdasy boıynsha elektrondy formatqa kóshiriledi», dedi B.Baıbek.
Shahar basshysy óz sózinde balabaqsha, mektep jáne turǵyn úı kezegin elektrondy júıege kóshirý azamattardyń memlekettik organdar jumysyn baqylaýyna, osy máselelerde qyzmetti asyra paıdalanýǵa jol bermeıtindigin atap ótti. Sonymen qatar Almatyda «Sıfrly Qazaqstan» baǵdarlamasy boıynsha «qaǵazsyz aýrýhanalar» júıesine tolyq kóshýdiń josparlanǵanyn jetkizdi.
Forým aıasynda B.Baıbek pen A.Shpekbaev bilim salasyndaǵy jemqorlyqqa qarsy is-qımyldyń elimizdegi alǵashqy «Sanaly urpaq» atty ofıstik jobasymen tanysty. Ál-Farabı atyndaǵy QazUÝ bazasynda ashylǵan ofıs jemqorlyqqa qarsy is-qımyl boıynsha arnaıy ádistemeler men baǵdarlamalar shyǵarýdy josparlap otyr.
Arman OKTIаBR, «Egemen Qazaqstan»
ALMATY