«Semeıdegi jas jýrnalıster qaýymdastyǵy» qoǵamdyq birlestigi, eriktiler men stýdent jastar qaladaǵy qart adamdarǵa joǵary tehnologııalyq smartfondarda tolyǵymen jumys isteýdi úıretý úshin, trenıng sabaqtaryn uıymdastyrdy. Jobanyń jetekshisi Leıla Saǵynaıqyzynyń aıtýynsha, bul Qazaqstannyń 16 qalasy boıynsha qatarynan ekinshi jyl qolǵa alynǵan sharýa. Sondyqtan bolar bıyl Semeı qalasynda jańa aqparattyq jáne smartfondyq tehnologııany úırený úshin qyzyǵýshylyq tanytqan qarııalardyń sany eki ese kóbeıipti.Máselen, egerde trenıng barysynda 10 adamdy oqytý kerek bolsa, sabaqqa 13-15 adam artyǵymen keledi eken.
- Ájeler, apalar, atalarymyz tipti osy trenıng-sabaqtar ótedi degen kezde, jarty saǵat erte kelip alyp, tosyp otyrady,-dedi Leıla Saǵynaıqyzy,bul jobanyń ereksheligi jasy úlken adamdardy smartfondy qoldanýshy deńgeıinde ıgertý. Osyǵan deıin bizdiń qoǵamdyq birlestik bastaýysh synypta oqıtyn balalary bar ata-analardy da osyndaı oqytý-úıretýden ótkizdi. Olar «GPS» mobıldi qosymshasy arqyly máselen, avtobýs baǵyttaryn anyqtaı alýy óz aldyna, balalarynyń ınternetke qalaı kirip, qansha ýaqyt otyratyndyǵyn baqylaı alatyn boldy. Árıne, bireýler aıtýy múmkin, bul balanyń quqyǵyn buzady dep, biraq ta, osyndaı oqytý-úıretý sharalary arqyly ata-analar jas balalaryn «Kók kıt» sııaqty qaterli uıymdardan aýlaq ustaı alady. Jáne smartfondardaǵy qosymshalar arqyly óz balalarynyń qaı jerde júrgenin de baqylaı alady. Osyǵan oraı 20 ata-ana bizden arnaıy trenıng sabaqtaryn aldy.
Qaladaǵy Dostyq úıinde ótkizilip jatqan sabaqtarǵa atalar men apalar belsendilikpen qatysypty. Barlyǵynyń qolynda bir-bir jańa smartfon. Úńile túsip, erekshe qyzyǵýshylyqpen úırenipti.
- Bul sabaqtarǵa jubaıymyz ekeýmiz birge keldik,-dedi qarııa Albert Peremykın,-ınternet-tehnologııalardy qoldanýdy úırený biz úshin asa mańyzdy. Trenıng óte jaqsy ótip jatyr. Árıne, qart adamdar jas bala sııaqtymyz ǵoı, bárin birden uǵyp ketý qyıyn. Degenmen túrli suraqtar týyndaǵan kezde qasymyzǵa kelip, jantalasa kómektesip, túsindirip jatqan Láıla Saǵynaıqyzyna jáne onyń kómekshilerine úlken rahmet. Bizge sabaq berýshilerdiń barlyǵy da bilikti jastar. Qarııa bolsaq ta, osyndaı trenıngter arqyly ómirge degen qyzyǵýshylyǵymyz arta túsýde.
Raýshan Nuǵmanbek,
Semeı