Búgin elordamyzda 11-shi Astana ekonomıkalyq forýmy bastaldy. Álemdik problemalardy sheshý joldary qarastyrylatyn forým Global Challenges Summit-2018 kongresi aıasynda ótedi.
Forým barysynda búgingi tańda álemdi alańdatyp otyrǵan 11 taqyryp tóńireginde sóz qozǵalady. Onyń ishinde birtutas ekonomıka, jańa taza energııa álemi, jahandyq qaýipsizdik, bolashaqqa boljam, jahandyq strategııa, jańa adamzat álemi, sıfrly álem, resýrstar álemi, bolashaqtyń aqshasy, bolashaqtyń qalasy syndy taqyryptar boıynsha spıkerler pikirlerin ortaǵa salady. Forýmǵa álemniń túrli elderinen 500-ge jýyq spıker qatysady. Olardyń ishinde Fransııanyń burynǵy prezıdenti Fransýa Olland, Apple Computer kompanııasynyń teń negizin salýshy Stıv Voznıak, BUU-nyń burynǵy bas dırektory Pan Gı Mýn, Dúnıejúzilik banktiń Eýropa jáne Ortalyq Azııa jónindegi bas ekonomısi Gans Tımmer bar.
Forýmnyń alǵashqy eki kúni kún tártibindegi jahandyq máselelerge arnalady, úshinshi kúni spıkerler QR Úkimetiniń, sarapshylar qoǵamdastyǵynyń ókilderimen alty baǵyt boıynsha jumys júrgizedi.
Aıta keteıik, Astana ekonomıkalyq forýmy eń alǵash 2008 jyly ótkizilgen. Alǵashqy forýmda dúnıejúzilik ekonomıka men qarjy júıesin ońaltý jáne damytý máseleleri talqylanǵan. Sodan beri forým yqpaldy halyqaralyq alańdardyń birine aınaldy.
Mádına JÁLELQYZY,
"Egemen Qazaqstan"