Bıyl aýa raıy qubylyp, jaýyn-shashynǵa ulasyp jatsa da jazǵy demalysqa qulshynyp otyrǵandar qanshama. Osyǵan oraı Býrabaı kýrortty aımaǵy demalysqa kelýshilerdi kútip alýǵa kirisip te ketti. «Býrabaı» ulttyq parki basqarmasy men týrıstik bıznes ókilderiniń basyn qosqan óńir basshysynyń qatysýymen ótken jıynda jazǵy týrızm máselesi keńinen sóz boldy.
Býrabaı aýdanynyń ákimi Qanat Qaraýylovtyń atalǵan jıynda keltirgen málimetine qaraǵanda, jyl saıyn týrızm ınfraqurylymy qarqyndy damyp keledi. Aǵymdaǵy jyldyń basynda 70 oryndyq «Arheı» shıpajaı kesheni paıdalanýǵa berilgen. Budan basqa, kýrortty aımaqta 100 oryndyq meımanhana kesheni, oıyn-saýyq jáne saýda ortalyǵy, qonaq úıler, turmystyq-mádenı jáne kóńil kóterý qyzmetterin kórsetý nysandary salynýda. Sondaı-aq 14 gektar jerdi qamtıtyn promenad aımaǵy men qonaq úıleri, sporttyq-saýyqtyrý, saýda-kóńil kóterý, áleýmettik-mádenı nysandardy qamtyǵan kópfýnksıonaldy keshen qurylysy bastalady dep kútilýde. О́z kezeginde «Býrabaı damý» JShS birtutas baılanys ortalyǵynyń basshysy Azamat Baımuqanov qonaq úıler keshenderiniń, meımanhanalardyń, týrıstik agenttikter men ekskýrsııalyq bıýrolardyń ózara jumys isteýi barysyn ortaǵa saldy.
Belgili bolǵandaı, «Álem» otelder jelisi óz klıentterine quramynda tegin ekskýrsııasy men jaıaý júrý, «Jaılaý» etnoaýylyn tamashalaý, «Burabay Land» kóńil kóterý parkine aparý, sondaı-aq kóńil kóterýge 50 paıyzdyq jeńildik beretin dıskonttyq kartalardy: kvadrosıklmen jáne atpen serýendeý, 5D kınoteatryn tamashalaý, tabıǵat murajaıyn kórý, sadaq atý jáne ózge de qyzmetterdi qamtyǵan týrıstik paket usynady eken. Al «Esil» ÁKK» UK» basshysy Qazbek Eskendirov jıynǵa qatysýshylarǵa Býrabaıda aǵashtan bir stılde qıyp jasalǵan 30-ǵa tarta saýda pavılondarynyń salynatyndyǵyn jetkizdi. Mundaı mehanızm kýrorttyq aımaqtyń sánin ǵana keltirip qoımaı, saýda-sattyqty da júıeleı túsetini kóldeneń tartyldy. Bul óz kezeginde týrısterdi sapaly ónimdermen qamtamasyz etýge, kásipkerlerdiń senimin arttyrýǵa múmkindik beredi.
Jıynǵa qatysqan oblys ákimi Málik Myrzalın týrıstik ınfraqurylym nysandarynyń daıyndyǵyn qamtamasyz etýdi jáne týrısterdi qabyldaýdy jolǵa qoıý kerektigine erekshe nazar aýdartty. Shomylý barysynda qaýipsizdikti qamtamasyz etý, qoǵamdyq ájethanalardy retke keltirý, aqparattyq anyqtamalardy ornalastyrý sııaqty jumystardy atqarýǵa tapsyrmalar berildi. Reti kelgende aıta ketý kerek, maral sharýashylyǵyna jaqyn jerde ornalasqan «Jaılaý» etnoaýylynda qonaqtarǵa arnap qazaq halqynyń dástúrin kórsetetin bolady. Jazǵy kezeńniń bastalýymen ulttyq oıyndarǵa qatysty ártúrli sharalar uıymdastyrylady dep kútilýde. Sonymen qatar atpen jáne jaıaý júrip Býrabaı aýdanyndaǵy qasıetti oryndardy aralatý da josparlanǵan. Jáne budan basqa da kóptegen is-sharalar kelýshilerdi keńinen tartý úshin jasalatynyn aıta ketý kerek.
Asqar TURAPBAIULY, «Egemen Qazaqstan»
Aqmola oblysy