Elimizde akkredıtasııadan ótken sheteldik dıplomatııalyq korpýs ókilderin elordanyń 20 jyldyq mereıtoıyn merekeleýge baılanysty ótkiziletin sharalarmen tanystyrý maqsatynda brıfıng ótti. Oǵan Syrtqy ister mınıstri Qaırat Ábdirahmanov, Astana qalasy ákimi Áset Isekeshev, halyqaralyq G-Global sekretarıat basshysynyń birinshi orynbasary Murat Qarymsaqov, Astana ákimdigi mádenıet jáne sport basqarmasynyń bastyǵy Bolat Majaǵulov qatysty.
Brıfıng barysynda Astana ákimi Áset Isekeshev dıplomatııalyq korpýs ókilderin qala kúnine daıyndyqtyń úsh toptamasymen tanystyrdy. Onyń aıtýynsha, birinshi toptamaǵa Mádenıet jáne sport mınıstrligimen birlese jasalǵan daıyndyq kirse, ekinshi toptamaǵa Qazaqstannyń ózge óńirlerimen birge daıyndalǵan sharalar, al úshinshi toptamaǵa sheteldik seriktestermen birlese ótkiziletin is-sharalar kiredi. Bul bastamalar Astanany iskerlik jáne mádenı týrızm ortalyǵy retinde tanytýǵa óz septigin tıgizbek.
«Jalpy, jyl boıy ótkiziletin mádenı sharalarǵa 1 mıllıonnan astam adam qatysady dep kútilýde. Sondyqtan ınjenerlik-áleýmettik ınfraqurylymdardy daıyndaý, qaýipsizdik pen jaılylyqty qamtamasyz etý boıynsha barlyq daıyndyq jumystary júrgizilip jatyr», dedi ol.
Sondaı-aq turǵyn úı aýlalaryn, saıabaqtar men gúlzarlardy, qoǵamdyq alańdardy abattandyrý boıynsha da aýqymdy jumystar júrgizilýde. Máselen, elorda kúninde 100-den astam, al jalpy osy jyly 400-ge jýyq jańǵyrtylǵan aýlany tapsyrý josparlanyp otyr. Olardyń basym bóligi «Rýhanı jańǵyrý» baǵdarlamasy aıasynda jeke ınvestorlardyń qarajatyna abattandyrylady dep kútilýde. Al elorda kúnine oraı 7 jańa saıabaq pen gúlzar ashylyp, 40 myńnan astam aǵash otyrǵyzylady.
Venera TÚGELBAI, «Egemen Qazaqstan»