«Úlken dýlyǵa» sanatyndaǵy týrnırlerdiń júldelik qory óte mol ekeni barshaǵa málim. Sol sebepti de osy sport túrin serik etken sańlaqtardyń barlyǵy da aıtýly jarysta barynsha tabysty óner kórsetýdi maqsat tutady.
Máselen, bul kúnderi Parıjde ótip jatqan «Rolan Garrostyń» júlde qory 39 197 000 eýrony quraıdy. Bul básekede Qazaqstannyń tennısshileri arasynda Iýlııa Pýtınseva eń jaqsy nátıje kórsetýde. Qazirdiń ózinde Pýtınseva 380 000 eýrony ámııanyna saldy. Eger osy mejeden otandasymyz súrinbeı ótse, onda onyń esep-shotyna 560 000 eýro aýdarylady. Iаǵnı jartylaı fınalǵa shyqqan oıynshylarǵa osynshama kólemde qarajat tıesili. Al aqtyq aıqasqa joldama alǵandar 1 120 000 eýrony ıelense, «Rolan Garrostyń» jeńimpazdary 2 200 000 eýrony oljalaıdy.
«Úlken dýlyǵa» týrnırleriniń bir ereksheligi – oǵan qatysýdyń ózi ár tennısshi úshin zor abyroı, úlken mártebe jáne materıaldyq jaǵdaıyn túzep alýǵa tamasha múmkindik. Tipten «Rol an Garrostyń» tusaýkeser kezdesýinde súringen oıynshynyń ózi 40 000 dollardy qaltaǵa basady. Ekinshi jáne úshinshi aınalymda óner kórsetkender 79 000 jáne 130 000 eýroǵa ıelik etse, tórtinshi kezeńge ótkender 222 000 eýrony enshiledi.
Osy oraıda joǵaryda aıtylǵan áńgime tek erler men áıelderdiń jekelegen saıysyna qatysýshylarǵa ǵana qatysty ekenin eskerte ketken jón. Sonymen qatar juptyq jáne aralas juptar arasyndaǵy básekelerde baq synaýshylarǵa beriletin qarajat taǵy bar.
Ǵalym SÚLEIMEN, «Egemen Qazaqstan»