Rýdnyıdaǵy Jedel járdem stansasyndaǵy bir kún

– Iá, biz ajalmen kún saıyn betpe-bet kezdesemiz desem bolady, rasynda solaı. Adamdardy aýrýhanaǵa jetkizip, aman alyp qal­ǵanymdy bilsem, sol kúni qa­­naǵattanǵandyq sezimmen janym da, júregim de jaı taba­dy. Jal­ǵyz men ǵana emes, árip­tes­te­rimniń barlyǵy da sondaı kó­ńil-kúıde ekenin bilemin. Je­del járdemdi shaqyrǵannan keıin aıtylǵan mekenjaıǵa qaraı qustaı ushasyń. Ásirese jaǵdaıdyń aýyr ekenin kórgende sa­­naý­ly mınýttar sanań­da tyr­syldap uryp tura­dy ǵoı, – dep basta­dy áńgimesin Rýdnyı qa­la­lyq Jedel járdem stan­sasynyń jo­ǵary sa­natty dárigeri Irına Klıých­nıkova. Ol biz kez­desken kúni de bir qa­rııa­ny júrek talmasynan aman alyp qalǵan eken. Qazir saıabaqta jumys qyzǵan kez. Jurt jer qaraıǵannan-aq qala syrtyndaǵy saıabaǵyn retke keltire bastaıdy. Ájeı stansaǵa jan daýsy shyǵyp, úreıli keıippen telefon shalady. «Saıabaqta meniń shalyma bir nárse boldy, telefon shalyp edi, biraq sóıleı almaıdy», deıdi janushyryp. Tapsyrmany Irına Iýrevnanyń brıgadasy aldy da, ájeıdiń aıtqan mekenjaıymen qala syrtyndaǵy saıabaqtardyń birine zýyldap ala jóneldi. Júrgizýshiler de kenshiler qalasyn bes saýsaqtaı biledi, kóliktiń qulaǵynda oınaıdy ǵoı. Saıabaqqa jetkenshe Irına Iýrevna da, júrgizýshi de ún qatysqan joq. Qansha degenmen ana, áıel ǵoı, Irına Iýrevna jol amandyǵyn tilep keledi, «jaı júr, baıqa» dep júrgizýshini alań­datýdan da seskenedi. Olar kel­gende qarııanyń túri buzylyp ketken eken. Ol kókirek tusyn kór­setkennen-aq ınfarkt ekenin bil­di. Naýqastyń kókireginiń kúı­ipbara jatqanyn janymen se­zin­gendeı boldy, endi ár mınýt esepte. Kardıogrammasyn tú­sir­gen­nen keıin, naýqasty «jedel jár­dem» mashınasyna saldy da, jatqyzǵan kúıi aýrýhanaǵa áke­lip, dárigerlerge tabys etti.

– Búgingi kúnim oljasyz emes. Biz shamaly keshikkende saıabaq­ta­ǵy ataıdyń jaǵdaıy qalaı bolaryn kim bilsin, ony aman alyp qa­lý ońaı bolmas edi, – deıdi Irına Iýrevna.

 Jol ústi zýlaǵan kólik, eki kúnniń birinde jol apaty bolyp jatady. Der ýaqytynda jetkenmen de Irına Iýrevnanyń ajal al­dynda dármensiz kúı keshken kez­deri de az bolǵan joq. Keı­de jan­ushyryp jetkende qan­josa bo­lyp jatqan atpaldaı aza­mat­tyń, qyrshyn jastyń tamyry soqpaıdy...

– Jol-kólik oqıǵasyna barý qaı dáriger úshin de ońaı emes. Biz de et pen súıekten jaralǵan adam­byz, jaırap jatqan jerge kel­gende psıhologııalyq kóńil-kúı dárigerlik biliktilikten basym túsip ketetin kezder bolady. Otyz eki jyldyń ishinde talaı aýyr jaǵdaıdy kórdik qoı, – deıdi dáriger.

Irına Klıýchnıkova Qara­ǵandy medısına ınstıtýtyn bi­tir­­gen soń, bir orynda – Rýdnyı qa­la­lyq Jedel járdem stansasynda ǵana qyzmet etip keledi. Úzilissiz!

– Osy jyldar ishinde Qazaq­stan medısınasynyń ósýi kere­met baıqaldy. Otyz jyl bu­ryn ınfarkt, ınsýlt, taǵy bas­qa qa­terli aýrýlardy aman alyp qa­lý óte kúrdeli edi. Qa­zir ońaı­lyqpen ajalǵa adam ber­meı­miz. Shúkirlik etemin osyǵan, – deıdi ol.

Alaıda onyń aıtýynsha, adam aǵzasynyń ǵy­lymǵa da belgisiz, tosyn jaılary jeterlik. Keı­de ınfarkt aýrýyna birden dıagnoz qoıady, óıt­keni onyń bel­gi­le­ri dáriger úshin badyraı­yp bi­linip turady. Al keıde kar­dıogrammanyń ózi eshteńe kór­set­peıdi, sonda da bilikti dári­ger ın­farkt dep jobalap, aýrý­dy tas­tap ketpeı, aýrýhanaǵa jet­ki­zedi.

– Aýrýhanadaǵy áriptes­te­rim­niń ózi alǵashynda kardıogramma eshnárse kórsetpegenin kó­rip, «naý­qasty nege ákeldińiz?» dep qalatyny bar. Biraq olar zert­teı kelgende naýqastyń dıagnozy báribir ınfarkt ekeni dáleldengen kezder de bolǵan. Jumystyń qıyndyǵy da osynda, naýqaspen de, dıagnozben de alǵash biz kezdesemiz, al qıyn jaǵdaılarda ajalmen de betpe-bet kelip otyramyz. Ár mınýt esep­te bolatyn arpalystyń ar­qa­synda ajaldy óńmeninen ıterýmen kelemiz, – deıdi Irına Iýrevna.

Qazir Jedel járdem stansalarynda maman­dar­dyń jetise bermeıtini belgili jaıt. Odan Rýdnyı stansasy da quralaqan emes. Sondyqtan Irına Iýrevna ǵumyr boıy jas mamandarǵa ustazdyq etýmen keledi.

– Jastar qazir teorııany jaq­sy biledi. Bizde tájirıbe bar. Kúndelikti aýyr jaǵdaıda jet­kizil­gen naýqastardyń dıagnozyn, belgilerin talqylap otyramyz. Ertip júrip úıretemiz. Biraq bul jumystyń qıyndyǵyna shydas ber­megen jastar ketip qalady. Ká­siptik biliktilikti jetildirý óte kúrdeli dep oılamaımyn, biz­diń jumystyń psıhologııalyq kóńil kúıge salmaq salatyn erek­sheligi bar, qıyndyǵy da osynda, – deıdi Irına Iýrevna.

Rýdnyı qalasyndaǵy Jedel járdem stansasy oblystaǵy osy sala úzdikteriniń biri.

– Irına Iýrevna dáriger­lik isiniń naǵyz mamany. Adam­dar­ǵa jedel járdem kórsetetin salaqı­yndyqtary jeterlik. Sonyń bar­ly­ǵyna tózip, oǵan ǵu­my­ryn ar­na­ǵan kisi. Osyndaı dári­ger­lerdiń arqasynda naýqastarǵa qyzmet kórsetý joǵary dárejede. Irına Iýrevna naýqastarmen de til tabysa biledi, ujymda da aqyl surar ardagerimiz. Aıt­­paq­shy, ol «jedel járdem qyz­me­tin­de dáriger bi­lik­tiligimen qa­tar, osy salanyń mádenıetin kó­te­­rý­ge úles qosqan dáriger, – deı­di Rýd­nyı Jedel jár­dem stan­sa­­synyń bas dárigeri Natalıa Bot­vınova.

Bizdiń jumys arasyndaǵy sál ǵana úzilisti paıdalanyp aıt­qan áńgimemiz kilt úzildi. Dıs­petcherge bezildep qońyraý tús­ti, Irına Iýrevna dári-dár­mek salǵan sómkesin aldy da, mashınaǵa jyldam basyp ba­ra jatty. Onyń endigi nazary naýqastyń jaǵdaıynda.

Názıra JÁRIMBET,

«Egemen Qazaqstan»

RÝDNYI