Elbasy Nursultan Nazarbaev ótken jyly jaryq kórgen «Táýelsizdik dáýiri» atty eńbeginde: «Jas memleketke mindetti túrde jańa, zamanaýı astana qajet ekenin táýelsizdiktiń birinshi kúninen-aq oıladym. Osy oıymnyń durystyǵyna nyq senimdi edim. 1992 jyldyń ózinde-aq Aqmolaǵa jumys saparymen kelgende, astanany osynda aýystyrý týraly oıǵa keldim» dep, jańa dáýirge qadam basqan elimizdiń baıandy bolashaǵy jaıly táýelsizdiktiń alǵashqy kúnderinen bastap, oıǵa alǵany jaıly jazypty.
Naqty sheshim retinde 1997 jylǵy 20 qazanda Qazaqstan Respýblıkasynyń Prezıdentiniń «Aqmola qalasyn Qazaqstan Respýblıkasynyń astanasy dep jarııalaý týraly» asa mańyzdy Jarlyǵy shyqty.
Osy bir tarıhqa toly 1997 jyldyń 7 qarashasynda Prezıdent Ákimshiligi men Úkimeti Almatydan Arqaǵa qonys aýdarsa, 10 jeltoqsan kúni Prezıdent Jarlyǵymen «Aqmola qalasy Qazaqstan Respýblıkasynyń jańa astanasy» dep tanyldy.
Osylaı bastalǵan jańa dáýir jylnamasyna bıyl 20 jyl tolyp otyr. Bir ǵana derek: 1998 jyly bar-joǵy 300 myńǵa jýyq turǵyny bar shaǵyn qalada qazir bir mıllıonnan astam adam ómir súrýde. Iаǵnı 20 jyl – 20 dáýir. Osyndaǵy árbir jyldyń qoınaýynda jańa dáýirge bet alǵan Qazaq eliniń tarıhy jatyr. Atap aıtqanda:
1998 jyl6 mamyr – «Qazaqstan Respýblıkasynyń astanasy Aqmola qalasyn Qazaqstan Respýblıkasynyń astanasy Astana qalasy dep qaıta ataý týraly» Qazaqstan Respýblıkasy Prezıdentiniń Jarlyǵy shyǵyp, dál osy kúni «Qazaqstan Respýblıkasynyń astanasy Astana qalasynda Saryarqa jáne Almaty aýdandaryn qurý týraly» Jarlyǵy jarııalandy.
6 mamyr – Qazaqstan Respýblıkasy Prezıdentiniń Jarlyǵymen Uly Otan soǵysyndaǵy nemis-fashıst basqynshylaryna qarsy kúreste kórsetken erligi men qaharmandyǵy úshin kishi serjant Baqtyoraz Beısekbaevqa «Halyq Qaharmany» ataǵy berilip, keshikpeı qaladaǵy Jýkovskıı kóshesi Baqtyoraz Beısekbaev bolyp ózgerdi.
7 mamyr – Prezıdent N.Nazarbaevtyń Jarlyǵymen Ádilbek Ryskeldiuly Jaqsybekov Astana qalasynyń tuńǵysh ákimi bolyp taǵaıyndaldy. 9 mamyr – Astanada túrki tildes memleketter basshylarynyń alǵashqy sammıti ótti. Oǵan Ázerbaıjan Respýblıkasynyń Prezıdenti Geıdar Álıev, О́zbekstan Prezıdenti Islam Karımov, Qyrǵyzstan Prezıdenti Asqar Aqaev, Túrkııa prezıdenti Súleımen Demırel, Túrikmenstannyń Májilis tóraǵasy Sahat Muradov jáne Qazaqstan Prezıdenti Nursultan Nazarbaev qatysty.
20 mamyr – Prezıdent N.Nazarbaev «Qazaqstan Respýblıkasy astanasynyń mártebesi týraly» zańǵa qol qoıdy. Zań el astanasynyń quqyqtyq mártebesin, saıası jáne ekonomıkalyq negizderin aıqyndap berdi.
9 maýsym – Qazaqstan Respýblıkasynyń astanasy – Astana qalasynda Otan qorǵaýshylar eskertkishi irgetasynyń qalaný rásimi boldy. Oǵan Túrkııanyń prezıdenti Súleımen Demırel, Qyrǵyzstannyń prezıdenti Asqar Aqaev jáne basqa da joǵary mártebeli meımandar qatysty.
10 maýsym – Astananyń halyqaralyq tusaýkeser toıy bolyp ótti. Tusaýkeserge josparly túrde ázirlený úshin arnaıy qysqa merzimdi baǵdarlama qabyldandy. Muny iske asyrýǵa 217 qazaqstandyq jáne sheteldik kompanııa qatysty. Qurylys-montaj ben jóndeý jumystaryna barlyǵy 13,8 myń adam qatysyp, qalanyń 248 myń sharshy metr aýmaǵy túbegeıli jańǵyrtyldy.
12 maýsym – Qazaq qoǵamyndaǵy bıler ınstıtýtynyń úlgisi retinde belgili halqymyzdyń qadirli tulǵalary: Tóle, Qazybek, Áıteke bılerge arnalǵan eskertkish Joǵarǵy sot ǵımaratynyń janynda ashyldy. Bul sharaǵa Memleket basshysy Nursultan Nazarbaev qatysty. 18 maýsym – Astana qalasynyń tusaýkeser rásimin álem qazaqtaryna tanytý maqsatynda osy kúni elorda tórinde dúnıe júzi qazaqtarynyń kishi quryltaıy ótti. Oǵan álemniń 20 elinen 100-ge tarta qonaq kelip qatysty.
7 qazan – Prezıdent N.Nazarbaev Astananyń jańa ortalyǵyn damytýdyń bas josparynyń joba-ıdeıasyna jarııalanǵan halyqaralyq konkýrstyń qorytyndysyn shyǵaryp, japon sáýletshisi Kıse Kýrokavanyń jumysyn jeńimpaz dep jarııalady.
15 jeltoqsan – Qazaqstan Respýblıkasynyń Prezıdenti N.Á.Nazarbaevqa Astana qalasyn elordasy retinde qaıta salýǵa, qalyptasýyna jáne perspektıvalyq damýyna qosqan zor úlesi úshin «Astana qalasynyń qurmetti azamaty» ataǵy berildi.
Daıyndaǵan Beken QAIRATULY, «Egemen Qazaqstan»