Sezd delegattary Qazaqstannyń barlyq oblystaryn jáne respýblıkalyq mańyzy bar qalalardy qamtıtyn tolyqqandy óńirlik jelini qalyptastyrý týraly sheshimdi birlesken sheshimmen maquldady. Bul qadam partııanyń uıymdyq damýynyń jańa kezeńin bastap, onyń óńirlerdegi turaqty qyzmetin qamtamasyz etýge múmkindik beredi.
«Amanat» partııasy «Ádiletke» qosylady
Partııa fılıaly týraly ereje jobasyn tanystyrǵan partııa Saıası keńesi Bıýrosynyń múshesi jáne sezd hatshysy Gúlzıra Atabaeva qujattyń qabyldanýy partııanyń uıymdyq negizin qalyptastyrýdy aıaqtap, óńirlik qurylymdardyń qyzmetin uıymdastyrýdyń biryńǵaı qaǵıdattaryn aıqyndaıtynyn atap ótti. Onyń aıtýynsha, fılıaldar aýmaqtyq qaǵıdat boıynsha qurylyp, birtutas partııalyq júıeniń quramdas bóligi retinde jumys isteıdi.
«Fılıal týraly ereje – partııanyń óńirlerdegi jumysy qalaı uıymdastyrylatynyn, aýmaqtyq qurylymdardyń qalaı qalyptasatynyn, jergilikti jerlerde sheshimderdiń qalaı qabyldanatynyn, sondaı-aq tártip, baqylaý jáne jaýapkershilik qalaı qamtamasyz etiletinin aıqyndaıtyn negizgi qujattardyń biri», dedi Gúlzıra Atabaeva.
Partııa Saıası keńesiniń múshesi Bórihan Nurmuhamedovtiń aıtýynsha, memlekettik tirkeý kezeńi aıaqtalǵannan keıin partııa praktıkalyq uıymdyq qurylys kezeńine kóshedi.
«Partııanyń bolashaǵy óńirlerdegi jumystyń nátıjesine tikeleı baılanysty. Azamattardyń senimi de dál sol jerde qalyptasady. Halyq partııany naqty isteri, bastamalary men nátıjeleri arqyly baǵalaıdy. Sondyqtan óńirlik qurylymdardy nyǵaıtý bizdiń basty mindetterimizdiń biri», dep atap ótti Bórihan Nurmuhamedov.
«AMANAT» Sezi Prezıdent reformalaryna qoldaý kórsetý jolynda «Ádiletke» qosylýdy maquldady
«Dala Qyrandary» jastar patrıottyq qozǵalysynyń ókili Mádı Rymjanov partııanyń damýynda myqty óńirlik uıymdardyń erekshe ról atqaratynyn aıtty.
«Kez kelgen saıası uıymnyń shynaıy kúshi onyń halyqpen birge bola alýymen, olardyń suranystaryn estýimen jáne elimizdiń ár óńirinde olardyń múddelerin tıimdi bildire alýymen aıqyndalady», dedi Mádı Rymjanov.
Partııa Saıası keńesiniń múshesi Dmıtrıı Pavlenkonyń sózinshe, fılıaldardy qurý partııanyń tıimdi jumys isteýi men odan ári damýynyń mańyzdy sharty sanalady.
«Partııanyń óńirlik jelisi ortalyq pen jergilikti jerlerdegi azamattar arasyndaǵy tikeleı baılanysty qamtamasyz etedi. Bul kez kelgen saıası kúshtiń turaqty damýy men tıimdi jumysynyń berik negizi bolady», dedi Dmıtrıı Pavlenko.
Erejeniń jeke bólimi ashyqtyq, eseptilik jáne ishki baqylaý máselelerine arnalǵan. Qujatqa sáıkes, óńirlik bólimsheler qabyldanatyn sheshimderdiń ashyqtyǵy men partııa músheleri jáne qoǵam aldyndaǵy jaýapkershilik qaǵıdattary negizinde jumys isteıtin bolady. Daýys berý qorytyndysy boıynsha delegattar partııa fılıaldaryn qurý týraly sheshimdi qoldap, «Ádilet» partııasy fılıaly týraly erejeni maquldady.
Eske salaıyq, Astanada «Ádilet» partııasynyń II Sezi ótip jatyr.