Búginde Aral teńizinen jylyna 8 myń tonna balyq aýlanyp, balyq ónimderin óńdeıtin 8 zaýyt jumys istep tur. О́ńdelgen balyqtary Reseı, Grýzııa, Ázirbaıjan, Danııa, Polsha men Qytaı elderine eksporttalady.
Aral óńiri balyqshylarynyń IV sletine oblys ákimi Qyrymbek Kósherbaev, QR Parlament Májilisi depýtattary, Aýyl sharýshylyǵy mınıstrliginiń, Halyqaralyq Araldy qutqarý qorynyń ókilderi, sala ardagerleri jáne Aqtóbe, Jambyl, Túrkistan, Mańǵystaý oblystary men Reseı federasııasynan delegasııalar keldi. Esterińizge sala keteıik, Ýlıanovsk oblysynyń Dmıtrovgrad qalasynda Araldyń balyǵyn óńdeıtin zaýyt salynǵan.
«Elbasynyń bastamasymen júzege asqan «Ǵasyr jobasy» atanǵan Aral teńiziniń soltústik bóligin saqtaý jobasy aıasynda atqarylǵan aýqymdy sharalar nátıjesinde, Aral óńiriniń ata kásibi – balyq sharýashylyǵy salasy jańa deńgeıge kóterilip, qarqyndy damýda. Qasıetti Syr eli óziniń jer asty baılyǵy – munaı, ýran, túrli-tústi metaldar, aq kúrishi, tórt-túlik malymen birge Aral balyǵymen maqtana alatyndaı berekeli, qutty mekenge aınalýda. Kóp jyl umyt bolyp, búginde dástúrge aınalǵan balyqshylar sletiniń negizgi maqsaty – salanyń jańa zamandaǵy alar orny jaıly oı salý, osy kásipti damytýdyń joldary týraly pikir almasý», - dedi oblys ákimi.
Atap óteıik, búginde Aral teńizinen jylyna 8 myń tonnaǵa deıin balyq aýlanady. Sońǵy 5 jylda aımaqtaǵy balyq aýlaý kórsetkishi 2 esege artqan. 2013 jyldan beri balyq ónimderin óńdeıtin 4 zaýyt salynsa, onyń 4-eýi ónimderin Eýropa elderine eksporttaýǵa múmkindik beretin eýrokodqa ıe.
Balyq ónimderi Reseı, Grýzııa, Ázirbaıjan, Danııa, Polsha men Qytaı elderine eksporttalyp jatyr. 2012 jylmen salystyrǵanda bul kórsetkish 8 esege artty. 2018 jyldyń I jartyjyldyǵynda balyq ónimderin eksporttaýda 32%-ǵa ósim baıqaldy.
Slet barysynda balyq sharýashylyǵynyń damýyna aıryqsha úles qosqan azamattar men eńbek ardagerleri Aýyl sharýashylyǵy mınıstrligi men oblys ákiminiń Alǵys hatymen, Qurmet gramotasymen jáne medaldarmen marapattaldy.
Esterińizge sala keteıik, aǵymdaǵy jyldyń naýryzynda Úkimet basshysy Baqytjan Saǵyntaevtyń oblysqa jasaǵan saparynda aımaqtaǵy balyq sharýashylyǵynyń jaǵdaıy jáne Aralda ótken arnaıy májiliste «Syrdarııa ózeniniń arnasyn retteý jáne Aral teńiziniń soltústik bóligin saqtaý» (SARATS-2) jobasynyń ekinshi fazasynyń iske asyrylý barysy keńinen talqylanǵan bolatyn. Nátıjesinde SARATS-2 jobasynyń ekinshi fazasynyń 4 komponentin respýblıkalyq bıýdjet esebinen iske asyrý jóninde sheshim qabyldandy.
Qyzylorda sý torabyn keshendi jóndeý, Jalaǵash, Qarmaqshy aýdandarynda ózenniń qorǵanys bógetterin nyǵaıtý jáne arnasyn túzetý, Qazaly aýdanynda Birlik eldimekeniniń tusynda kópir salý jumystary bastalyp ketti. Sonymen qatar, balyqshylardyń ótinishi boıynsha Kókaral bógetin nyǵaıtý jáne «Qarashalań» men «Tushy» kólderiniń tusynda ózenniń atyrabyn qalpyna keltirý jóninde de tıisti sheshimder qabyldandy. Bul sharalar – Kókaral bógetin nyǵaıtýǵa, Soltústik Aral teńiziniń sý aınalymyn qalyptastyrýǵa, teńizdiń tuzdanýyn tómendetýge jáne balyqtardyń Úlken Aral teńizine ketýin azaıtýǵa múmkindik beredi.
О́tken jyly Ortalyq Azııa elderi ókilderiniń qatysýymen Qyzylordada uıymdastyrylǵan birinshi Aral halyqaralyq turaqty damytý forýmy barysynda Halyqaralyq Araldy qutqarý Qorynyń qurylǵan kúni 26 naýryz – «Aral teńiziniń kúni» bolyp jarııalanǵan bolatyn. Bıyl Halyqaralyq Araldy qutqarý Qorynyń 25 jyldyǵy aıasynda alǵash ret «Aral teńiziniń kúni» oblysta saltanatty túrde atalyp ótildi.