Arqa tósin dúbirletken Astana toıy áli de tarqaı qoımaǵandaı. Qoǵamdyq damý mınıstrliginiń Jastar saıasaty departamenti respýblıkalyq jastar uıymdarymen birlesip elorda arbatynda «Jan júregim – Astana!» atty jastar shyǵarmashylyq festıvalin ótkizýi sonyń dáleli bolsa kerek.
Festıval aıasynda Astana qalasynyń 20 jyldyq merekesine arnalǵan buqaralyq-mádenı is-sharalar ashyq aspan astynda erekshe kóterińki kóńil kúıde ótti. Avtosherý fleshmoby, shahmat boıynsha blıs-týrnır, kúı-sherý, jastar arasynda gıtarada tanymal ánderdi oryndaý, qolónershiler buıymdarynyń kórmesi syndy túrli janrdaǵy qyzyqty sharalar jastardyń kóterińki kóńil kúıimen mereke sánin onan saıyn arttyra tústi.
Atalǵan is-sharaǵa Qoǵamdyq damý mınıstri Darhan Káletaev jáne Astana qalasy ákiminiń orynbasary Ermek Amanshaev qatysyp jastardyń jarqyn bastamasyna qoldaý kórsetti. Igi isten elimizdiń estrada ánshileri de syrt qalmaǵan. Qydyráli Bolmanov, Qaraqat Ábildına bastap, Qanat Úmbetov, aǵaıyndy Júginisovter qostaǵan basqa da ánshiler án salyp festıval kórigin qyzdyrdy.
«Festıval ótkizýdegi maqsat – jastardyń azamattyq jáne shyǵarmashylyq belsendiligin arttyrý bolyp tabylady. 20 jyl ishinde elorda jastardyń qalasyna aınaldy. Búgingi elordada jastardyń qatysýymen asa kóp qarjylyq shyǵynsyz aýqymdy jáne jappaı is-sharalardy ótkizý úshin barlyq jaǵdaılar men múmkindikter jasalaǵan. Búgingi «Jan júregim – Astana!» jastar shyǵarmashylyq festıvali osynyń dáleli», deıdi Qoǵamdyq damý mınıstrliginiń Jastar saıasaty departamentiniń basshysy Ashat Oralov.
Atalmysh shara respýblıkalyq jastar uıymdarynyń bastamasy boıynsha uıymdastyrylǵan. Atap aıtqanda, «Qazaqstan jastar kongresi», «Jasyl el», «Jas ulan», uıymdary, «Qazaqstan KVN odaǵy», RMK «Ulttyq Delfıı komıteti» QQ, «Qazaqstan stýdentteriniń alıansy» QQ, sondaı-aq Qazaqstan Respýblıkasy Prezıdentiniń «Bolashaq» halyqaralyq stıpendııasy stıpendıanttarynyń qaýymdastyǵy qoldaý kórsetken.
Ularbek NURǴALYMULY, «Egemen Qazaqstan»