Qalamgerler shyǵarmalaryna qurmet

Elimizde bastaý alǵan «Bir el – bir kitap» aksııa­sy kópshiliktiń rýhanııatqa degen qyzyǵýshylyǵyn oıatyp, ádebıet álemine jeteleı túse­tini sózsiz. Bıylǵy jyly Shákárim Qudaıberdiulynyń shyǵar­malary, Baýyrjan Momysh­ulynyń «Ushqan uıa» jáne Nemat Kelimbetovtiń «Úmit úz­gim kelmeıdi» atty kitaptary oqýǵa tańdalǵan bolatyn. Osy oraıda atalǵan aksııa aıasynda Jambyl oblystyq zaǵıp jáne kózi nashar kóretin azamat­tar kitaphanasynyń uıym­das­tyrýymen «Ult rýhanııatynyń úsh dińgegi» atty ádebı-sazdy kesh ótti. 

Shara barysynda kitapha­nashy­­lar Qarlyǵash Bıtóreeva men Maıa Ázimqulova atalǵan qalam­­gerlerdiń ómir jolyna toq­ta­lyp, kitaptardyń qazaq áde­bıeti úshin mańyzdylyǵyn aıtty. Sony­men qatar úsh qalam­ger­­diń shy­ǵar­malaryndaǵy stıldik erek­­shelikter de saralandy. 

Budan keıin atalǵan ki­tap­hana­nyń Saǵymkúl Shadyrqulova, Baltash Esepbaev syndy turaqty oqyrmandary Shákárimniń «Bul án burynǵy ánnen ózgerek», «Anadan alǵash týǵanda» ánderin naqyshyna keltire oryndap, kópshiliktiń kóńilin terbetti. Sondaı-aq Ánýarbek О́telov, Erbol Begimov, Pirmat Mahmut Abaı Qunanbaıulynyń «Kózim­niń qarasy», «Jelsiz túnde jaryq aı» ánderin tyńdarmandar­ǵa tartý etti. О́z kezeginde Taraz qalasyndaǵy Iý.Gagarın atyn­daǵy №29 orta mekteptiń oqý­shysy Meıirjan Qýanyshbaev pen №1 mektep-gımnazııanyń oqý­shysy Jalǵas Myqtybek Shákárim shyǵarmalarymen qatar, Abaı jáne Muqaǵalı Maqataev óleńderin jatqa oqyp berdi.

Aıta keterligi, ádebıetsúıer qaýym­ǵa shara barysynda bir­qatar kórkem shyǵarmalar jına­ǵy tegin taratyldy. Ult rýhanııa­tyn dáripteýge, qazaq qalam­ger­leriniń shyǵarma­shylyǵyn nası­ha­ttaý maqsatynda uıymdas­tyryl­ǵan shara joǵary deńgeıde ótti. Jıyn sońynda atalǵan ki­tap­ha­na­nyń ádiskeri Farıda Me­ter­qulova sóz alyp, kesh qo­naq­tary men kitaphananyń turaqty oqyrmandaryna alǵys bildirdi.

 Hamıt ESAMAN, «Egemen Qazaqstan» Jambyl oblysy