Qoǵamdyq damý mınıstri Darhan Káletaev jumys saparymen Birikken Arab Ámirlikterinde bolyp, BAÁ Toleranttylyq mınıstri sheıh Nahaıan ben Mýbarak Ál Nahaıanmen kezdesti. Kezdesý barysynda dinaralyq dıalog pen qoǵamdyq kelisim máseleleri boıynsha eki jaqty yntymaqtastyqty damytý joldary talqylandy.
Darhan Káletaev ishki saıası turaqtylyq, dinaralyq jáne etnosaralyq úılesimdi qamtamasyz etý máseleleri tikeleı Qazaqstan Respýblıkasy Prezıdentiniń nazarynda ekenin atap ótti. Sondaı-aq Birikken Arab Ámirlikteriniń ómirdiń barlyq salalaryna tózimdilik prınsıpterin engizý úderisi keshendi kózqaras ekenin aıtty. Taraptar álemniń túrli óńirlerinde memleket ishilik jáne jahandyq deńgeıdegi ár túrli etnıkalyq toptar men dinder ókilderiniń arasyndaǵy qaqtyǵystyń oryn alýy ózara baılanysy men yntymaqtastyǵynyń álsireýimen tyǵyz baılanysty ekenin atady.
Halyqaralyq yntymaqtastyqty nyǵaıtý qajettiligine toqtala otyryp, sheıh Nahaıan ben Mýbarak Ál Nahaıan Qazaqstan kóshbasshysynyń dinaralyq dıalogty ilgeriletýdegi kúsh-jigerin, sondaı-aq halyqaralyq turaqtylyq pen túrli qaqtyǵystardy retteýdi kúsheıtýge baǵyttalǵan ózge de bitimgershilik bastamalaryn joǵary baǵalady. Osy turǵyda, Nahaıan ben Mýbarak Ál Nahaıan Qazaqstan Prezıdentiniń bastamasymen ótetin Álemdik jáne dástúrli dinder lıderleriniń sezi shyn máninde túrli din ókilderin biriktiretin jahandyq dıalog alańyna aınalǵanyn jáne budan bólek, aldaǵy 2018 jylǵy 10-11 qazan kúnderi ótetin VI Astana sezine ózderiniń qatysýyn rastaıtynyn málimdedi.
Birikken Arab Ámirlikterine sapary aıasynda QR Qoǵamdyq damý mınıstri D.Káletaev Birikken Arab Ámirlikteriniń Ulttyq Federaldyq Májilisi tóraǵasynyń birinshi orynbasary Marýan ben Gleıtpen kezdesti. Taraptar eki el arasyndaǵy parlamentaralyq baılanystardyń turaqty damýyna kóńilderi tolatyndaryn jetkizdi. Mınıstr BAÁ Ulttyq Federaldyq Májilisiniń eldiń ishinde jáne halyqaralyq deńgeıde toleranttylyq, konfessııaaralyq jáne dinaralyq dıalog ıdeıalaryn keńeıtý jáne nyǵaıtýǵa qosqan úlesin atap ótti. Buǵan Birikken Arab Ámirlikteriniń dinı tózbeýshilik jáne kemsitýshilikpen kúresý, sondaı-aq terrorızmge qarsy kúres týraly zańdary dálel.
Sondaı-aq, mınıstr Dýbaı ámirliginiń Islam jáne qaıyrymdylyq isteri departamentiniń Bas dırektory Hamad ash-Sheıbanımen kezdesti. Atalǵan qurylym qaıyrymdylyq qaýymdastyqtar men ıslam ınstıtýttaryna lısenzııa berý, qoǵamdaǵy dinı saýattylyqty arttyrý máselelerimen aınalysady. Hamad ásh- Sheıbanı Darhan Káletaevqa aǵymdaǵy jyldyń 15-16 qarashasynda Dýbaıda Halyqaralyq toleranttylyq sammıtin ótkizýdi uıymdastyrý boıynsha josparlarymen bólisip, Qazaqstan delegasııasynyń atalǵan sammıtke qatysýyna senim bildirdi. Sondaı-aq, Departament basshysy Astanada ótetin Álemdik jáne dástúrli dinder lıderleriniń VI sezine qatysýǵa daıyn ekendikterin bildirdi. Birikken Arab Ámirlikteriniń Baqyt Mınıstrliginiń ókilderimen kezdesý barysynda BAÁ tarapy bul qurylymnyń qyzmeti týraly habardar etti jáne Qazaqstandyq áriptesterimen yntymaqtastyqty damytýǵa jáne tájirıbe almasýǵa daıyn ekendikterin jetkizdi.