«Árıne, áýeli jaryq bolýy kerek...» degen ejelgi támsildi týra maǵynasynda qaıtalaýdyń reti kelip tur. Bul jerdegi mysaldy kóne kitaptardan emes, sharýasy ońynan kelgen shaǵyn zaýyttyń kúndelikti tirshiliginen almaqpyz.
Almaty oblysynyń Jambyl aýdanyna qarasty Qasymbek atty aýyl bar. Osy aýylda álemdik standarttarǵa saı elektr taýarlaryn óndiretin zaýyt jumys isteıdi. 2012 jyly ashylǵan «Qaz Tek Invest» kásiporny kúndelikti turmysta qoldanatyn jáne kósheni jaryqtandyrýǵa qoıylatyn jaryqshamdar, lampalar, aspaly shamdar, rozetkalar, tok uzartqyshtary men basqa da jaryq tehnıkasy jabdyqtaryn jasaýmen shuǵyldanady. «Qaz Tek Invest» kásiporny Almaty oblysynyń ǵana emes, elimizdiń ekonomıkasyna qyzmet kórsetip otyrǵan jáne óńirdegi áleýmettik máselelerdiń sheshilýine úles qosýshy biregeı otandyq óndiris. О́nim óndirýshi zaýytta 300-ge jýyq adam turaqty jumyspen qamtylǵan. Respýblıka boıynsha 4 fılıaly men 13 dılerlik dúkeni jumys istep tur.
– 2015 jyly «Teksan Metall» jobalyq jelisi boıynsha elektrqalqandardy, órt qalqandaryn, qoqys jáshigin, sheshinýge arnalǵan jáne qujattar muraǵatyna arnalǵan metall shkaftardy jasaýdy jolǵa qoıdyq. Búginde Bishkekte, Dýshanbede, Tashkentte jáne Dýbaı, Panama men Ganada bólimshelerimizdi ashtyq, – deıdi kompanııanyń bas dırektory Dıas Qurmashev.
Qazir kásiporynnyń zaýytynda aı saıyn 200 myń danaǵa jýyq ónim shyǵarylady. Iаǵnı keńsede, kóshede, óndiriste jáne kúndelikti turmysta qoldanylatyn jaryqdıodty shamdardyń 350 túrli nusqasy daıyn kúıinde naryqqa jóneltilip jatyr. Shamdarǵa qajetti zattardyń 92 prosentin jergilikti ónim quraıdy. О́nimniń sapasyn Japonııa, Túrkııa men Gollandııadan ákelingen qural-jabdyqtar qamtamasyz etedi.
«Qazaqstanda jasalǵan» brendin álemge tanytý baǵytynda da «Qaz Tek Invest» kásiporny aıtarlyqtaı eńbektenýde. Anyǵynda, zaýyttyń eksporttyq áleýeti zor. Qazirgi kezde Qasymbek aýylynda jasalǵan jaryqdıodty shamdar Reseı, О́zbekstan, Qyrǵyzstan, Tájikstan jáne Parsy shyǵanaǵy, Latyn Amerıkasy elderine, BAÁ, Gana sııaqty memleketterge eksporttalady eken. Bul jaıynda kásiporyn basshysy Dıas Qurmashev:
– Biz elimizde birinshi bolyp otandyq taýardy Parsy shyǵanaǵy elderine, Latyn Amerıkasy men Afrıka elderine eksporttaı bastadyq. Gýan Chjoý qalasynda jaryqdıodty deńgeıler men drosselderdi shyǵaratyn jeke zaýytymyz bar. Bizdiń mamandar kez kelgen ónimge 10 jylǵa deıin kepildik beredi, – deıdi.
Qalmahanbet MUQAMETQALI, «Egemen Qazaqstan»
Almaty oblysy, Jambyl aýdany