«Talannyń» tusaýy kesildi

Elordanyń kezekti bir ke­shin naǵyz kıno atmosferasy­na bólegen aıtýly sharaǵa fılm rejısseri Bolat Qalym­betov, týyndy avtory Jú­sipbek Qorǵasbek, basty ról­degi akterler – Asan Májıt, Erik Jol­jaqsynov, Shynar Ja­nys­bekova, Erjan Nurymbet jáne Dýlat Isabekov, Israıyl Sapar­baı bastaǵan ádebıet pen óner álemi­niń kórnekti tulǵalary qatysty.

«Talan» – Bolat Qalym­be­tovtiń «Sardardan» keıingi 13 jyl­dyq úzilisten soń jaryqqa shyqqan jańa týyndysy. Ja­zýshy Júsipbek Qorǵasbektiń «Qasqyr-adam» povesiniń jelisi boıynsha túsirilgen rejısserdiń kórermenin uzaq kúttirgen bul fılminde jıyrmasynshy ǵasyr­dyń 30-40-shy jyldardaǵy el tarıhynda oryn alǵan oqıǵa­lar qarapaıym adamdardyń ómiri arqyly baıandalady. 

– Kezinde Bolat ekeýmiz fılm­niń ataýyn uzaq oılandyq. So­dan taǵdyrdyń bir tereń tamyryn izdedik te, talandy taýyp, jańa týyndyny osylaı atadyq. Jalpy, bul – Bolattyń kınosy ǵoı. Biraq men búgingi týyndy týraly «Aıaǵanǵa arnalǵan kıno» degen maqala jazǵym keledi. Kitaptan shyǵarmamdy kórip, fılmniń alǵashqy jobasyn oılaǵan Aıa­ǵan Shájimbaı degen dosym bolatyn. Meniń povesim boıynsha túsirilgen ózderińiz jaqsy biletin «Jansebil» fılminiń rejısseri. «Qasqyr-adam» Aıa­ǵan­nyń ónerge aınaldyrsam degen ekinshi kórkem kınosy bolatyn. Biraq úlgermedi. Endi, mine arada kóp jyl ótkennen keıin Bolat sony jańasha tiriltti. О́ziniń qoltańbasy kórinip tur. Múldem basqa, jańa kıno jasady. Qazir «kod» degen sóz sánge aınalyp ketti ǵoı. Men sol kodty shyǵarmashylyq adam retinde rejısser jumysynan kórdim. Kórermenin tarıh tereńine boı­latyp, oılantatyn adam, adam­nyń taǵdyry jaıly jaqsy bir fılm ómirge keldi ǵoı dep oılaımyn, – dedi týyndy avtory, jazýshy Júsipbek Qorǵasbek kórsetilimnen keıingi áserimen bólisip. 

«Talan» fılminiń álemdik tusaýkeseri Irannyń Tegeran qalasynda uıymdastyrylǵan 36-shy halyqaralyq Fadjr kıno­festıvaliniń «Shyǵys pano­rama­sy» konkýrstyq baǵdar­lamasy sheńberinde ótken bolatyn. Sonymen qatar atalǵan týyndy jaqynda ǵana Astanada ótken XIV halyqaralyq «Eý­razııa» kınofestıvaliniń «Eý­razııa» júreginen» baǵdar­lamasynda kórsetildi. 

– «Talan» sózi – taǵdyr degendi bildiredi. Sondyqtan da bul fılmde men sol zamandaǵy adamnyń beınesin jáne el basyna tóngen náýbet arqyly halyqtyń taǵdyryn kórsetkim keldi, – deıdi kartınanyń rejısseri Bolat Qalymbetov.

Esterińizge sala keteıik, adam taǵdyry sóz bolatyn «Ta­­lan» kórkem fılmi 2018 jyl­dyń 20 qyrkúıeginen bas­tap jal­pyhalyqtyq prokatqa shyqty.

Nazerke JUMABAI, 

«Egemen Qazaqstan»