Qostanaıǵa kelgen Qoǵamdyq damý mınıstri Darhan Káletaev aldymen oblys aktıvimen kezdesti. Ol Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynyń formaty da, sapasy da erekshe, jańa ekenin atap ótti. Tarıhı qujatta Elbasy ekonomıkany damytyp, áleýmettik salany nyǵaıtý úshin bankrottyq tártibin jeńildetý, jergilikti mańyzǵa ıe habtardy damytý, basqarylatyn ýrbanızasııany engizý sekildi máselelerdi der ýaqytynda ári oryndy kóterdi.
Darhan Káletaev Joldaýda aıtylǵan muǵalimder mártebesi máselesine erekshe toqtaldy. Ol týraly zańnyń qabyldanýyna oraı usynystar engizý úshin qostanaılyqtardy belsendi bolýǵa shaqyrdy. Sonymen qatar mınıstr Joldaýda aıtylǵan jastar máselesine oraı, elimizde arnaıy jastarǵa arnalǵan baǵdarlamanyń bolmaıtynyn eskertti. Sebebi elimizde júzege asyrylyp jatqan baspana, jumysqa ornalastyrý, bilim jónindegi memlekettik baǵdarlamalardyń barlyǵy da jastar máselesin sheshýge arnalady. Mınıstrdiń aıtýynsha, qazir elimizde jastar demografııasynyń tómendep ketkeni baıqalady, 14 pen 18 jas aralyǵyndaǵylardyń sany jarty mıllıonǵa zorǵa jetetini 2000-shy jyldardaǵy bala týý sanynyń tómen bolýymen túsindiriledi. Bul kórsetkish aldaǵy jyldary kóteriledi.
Aktıvke qatysýshylar mınıstrge jastar arasynan kadrlar daıyndaý, úkimettik emes uıymdarǵa arnalǵan memlekettik satyp alý, qoǵamdyq keńester máselesi týraly suraqtar qoıyp, jaýap aldy.
Oblys ákimi Arhımed Muhambetov aktıv otyrysyn qorytyndylaı kele, Elbasy Joldaýyndaǵy aıtylǵan tapsyrmalardy júzege asyrýdyń óńirlik jospary qaralyp jatqanyn jáne aýdandar men qalalarda Joldaýdy túsindirýmen aınalysatyn 21 aqparattyq top qurylyp, jumysty bastap ketkenin aıtty.
Názıra JÁRIMBET,
«Egemen Qazaqstan»
QOSTANAI