Búginde oblys ortalyǵynda jumys isteıtin onnan astam gaz quıý beketinde suıyq otynnyń jetispeýshiligi qatty sezilip otyr.
Qala turǵyny Dmıtrıı Netısov suıyq otyn izdep, qansha jerge barsa da, uzyn-sonar kezekke tap bolypty. Ol sııaqty qasqaldaqtyń qanyndaı tapshylyqqa aınalǵan kógildir gazdy izdep, tabanynan taýsylyp, taýany shaǵylǵandar jetip artylady. Máseleniń jýyq arada sheshilerine gazben jabdyqtaýshylardyń ózderi de kúmándi.
«SQO Gaz» gaz beketiniń basqarýshysy Valerıı Jebrovskııdiń aıtýynsha, kólik ıelerine belgili shekte ǵana bosatylýda. Al, keı gaz quıý beketterinde múldem taýsylǵan.Kórshiles Aqmola oblysynda bir lıtr gazdyń baǵasy 56 teńge bolsa, Soltústik Qazaqstanda 73 teńgeden bosatylýda. Gaz ballondaryna quıdyrtý 90 teńgeni quraıdy. Osyndaı qymbatshylyqqa qaramastan baǵa taǵy kóterile me degen qaýip joq emes.
«Pavlodar munaı-hımııa zaýytynyń ýaqytsha jóndeýge jabylýyna baılanysty birqatar qıyndyqtar oryn alyp otyr. Áıtpese, eki jyl boıy gaz jetispeýshiligi bolǵan emes. Gazdyń alǵashqy partııasynyń jetkizilýin kútip otyrmyz», deıdi energetıka jáne turǵyn úı-kommýnaldyq sharýashylyq basqarmasy basshysynyń orynbasary Aıdarhan Mýsın.
О́mir ESQALI,
«Egemen Qazaqstan»
Soltústik Qazaqstan oblysy