Qarashanyń 13-16 kúnderi Temirtaý qalasynda Respýblıka mektepteriniń 11-synyptarynda oqıtyn jas ıntellektýal oqýshylar arasynda jaratylystaný-matematıkalyq baǵytyndaǵy pánder boıynsha Prezıdenttik 11-shi olımpıada ótti. Olımpıadaǵa 14 oblystan jáne Respýblıkalyq mańyzy bar Astana, Almaty, Shymkent qalalarynan 157 oqýshy qatysyp, baq synasty.
Atalǵan jarysta Astana qalasynyń Raıymbek batyr atyndaǵy №50 «Qazǵarysh» mektep-lıseıinen qatysqan 11 «A» synyp oqýshysy Jumahan Nurshat oza shaýyp, júldeli 2-oryn jáne kúmis medal ıegeri atandy.
Bilim jáne ǵylym mınıstrliginiń málimetinshe olımpıadanyń alǵashqy aımaqtyq kezeńine 2461 oqýshy qatysqan. Qatysýshylarǵa berilgen tapsyrmalar jıyntyǵy joǵary halyqaralyq standarttarǵa sáıkes daıarlanǵan. Birinshi kezeńniń qorytyndysy boıynsha elimizdiń barlyq aımaqtarynyń 407 mektep bitirýshi on-line rejıminde ótkizilgen olımpıadanyń qashyqtyq kezeńine qatysyp, olardyń 161-i jarystyń qorytyndy kezeńine joldama alǵan.
«Bul olımpıada negizinen 3 kezeńnen turady. Alǵashqy ekeýinen ótip, júzden júırik, myńnan myqty shyqqandar respýblıkalyq jarysqa joldama alady. Osy jolǵy saıysta ózime qıyn boldy. Sebebi, bul olımpıada bolsa da UBT sııaqty tekserý jaǵy da, baqylaýshylar da qatal. Synaqty negizgi 4 pán boıynsha tapsyrdyq. Olardyń ishinde fızıka, matematıka, hımııa, bıologııa bar. Aıta ketetin taǵy bir jaıt, bul olımpıada tek mektep bitirýshi túlekterge arnalǵan. Men ózim fızıka-matematıka pánin tańdap, bolashaqta osy salada muǵalim bolsam degen oıym bar. Maǵan unaǵan taǵy bir nárse bul olımpıadanyń Temirtaý qalasynda ótýi. Sebebi, Elbasy Nursultan Nazarbaev eńbek jolyn osy shahardan bastaǵan. Bul bizdiń bolashaq ómirimizge úlken senim men serpin berdi. Bul jetistik tek meniń ǵana jetistigim emes. Osy belesti ustazdarymnyń bergen biliminiń, jaqyndarymnyń artqan úmitiniń, mektebimniń maǵan degen seniminiń arqasynda baǵyndyrdym. Eń bastysy jeńis emes. Men Prezıdenttik olımpıadaǵa qatysyp elimizdiń bolashaǵy bolatyn daryndy balalarmen tanysyp, ózime kóp dos taba bildim. Bilim jolyn qýǵan árbir oqýshy úshin bul sózben aıtyp jetkize almaıtyn qýanysh. Bul meniń jáne meniń ustazdarymnyń 11 jylǵy eńbegi. Endigi bul jetistik tek bastamasy ǵana dep oılaımyn. Bolashaqta ustaz degen uly atqa ıe bolyp, bilikti maman atanyp, egemendi elimizdiń bolashaǵy úshin úlken úlesimdi qosamyn. Bilim men ǵylymnan jetken jetistikterime ata-anamnyń jáne týystarymnyń qosqan úlesin aıtpaı kete almaımyn. Sol jandardan qanyma sińgen oqýǵa degen ynta meni jigerlendiredi. Al ol kisilerdiń bala Nurshattyń bilimge degen qushtarlyǵyn baıqap, maǵan demeý bola bilgenine alǵysym sheksiz», deıdi Raıymbek batyr atyndaǵy №50 «Qazǵarysh» mektep-lıseıiniń 11-synyp oqýshysy Jumahan Nurshat.
Qazylar alqasynyń sheshimi boıynsha altyn medaldar jáne I dárejeli dıplomdarmen 8 qatysýshy, II dárejeli dıplomdar jáne kúmis medaldarmen 12 qatysýshy, III dárejeli dıplomdar jáne kúmis medaldarmen 18 qatysýshy marapattalǵan.