Oral qalasynda operatorlardyń qatysýynsyz, elektrondy kilt arqyly ózine qajetti kez kelgen qujatty ózi rásimdep alatyndaı halyqqa qyzmet kórsetý ortalyǵy ashyldy. Zamanaýı úlgidegi sıfrlyq tehnologııalarmen jabdyqtalǵan «Azamattarǵa arnalǵan úkimet» memlekettik korporasııasynyń front-ofısinde 454 qyzmetti elektrondy túrde alýǵa bolady.
- Buǵan deıin mundaı ortalyqtardyń qyzmeti respýblıkalyq mańyzy bar qalalarda ǵana qoljetimdi bolatyn. Memlekettik qyzmet kórsetý reestri boıynsha qazirgi tańda 741 memlekettik qyzmet túri bar, sonyń 454 memlekettik qyzmet túri osy jerde elektrondy túrde kórsetiledi, - deıdi «Aamattarǵa arnalǵan úkimet» MK OF PR-menedjeri Jádiger Dármenov.
Ortalyqtyń ashylýyna Qazaqstan Respýblıkasynyń memlekettik qyzmet isteri jáne sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha departamentiniń basshysy, Ádep jónindegi keńes tóraǵasy Bolat Isaqov, Batys Qazaqstan oblysynyń aqparattandyrý, memlekettik kórsetiletin qyzmetter jáne arhıvter basqarmasynyń basshysy Sáken Nurtazaev, «Azamattarǵa arnalǵan úkimet» memlekettik korporasııasynyń Batys Qazaqstan oblysy boıynsha fılıaly dırektory Marat Bassarov qatysyp, jańa bastamanyń qalaı júzege asyp jatqanyn kórdi.
- Ortalyqta aptasyna alty kún boıy halyqtyń sıfrlyq saýattylyǵyn arttyrý maqsatynda oqytý synyptary jumys jasaıtyn bolady. Ol jerde kez kelgen adam óz bilimin shyńdaýǵa múmkindigi bar», - deıdi «Azamattarǵa arnalǵan úkimet» memlekettik korporasııasynyń Batys Qazaqstan oblysy boıynsha fılıaly dırektory Marat Bassarov.
«Azamattarǵa arnalǵan úkimet» memlekettik korporasııasynyń front-ofısinde azamattar arnaıy stend-pavılondarda ornalasqan qoǵamdyq qol jetkizý pýnktteriniń, «ConnectionPoint» óz-ózine qyzmet kórsetý sektorynyń jáne planshetterdiń kómegimen elektrondyq ótinimderdi óz betinshe tapsyra alady. Sondaı-aq, operatordyń kómeginsiz ózderine qajet kez kelgen qujatty rásimdep, sıfrlyq saýattylyq daǵdylaryn shyńdaı alady.
2018 jyly Batys Qazaqstan oblysynda memlekettik qyzmetti elektrondy úkimet portaly arqyly alýshylar qatary kóbeıgen. Sala mamandary Mobıldi azamattar bazasyna tirkelip, «Connection point» sektorynda ózdiginen qyzmet alýshylardyń sany da ótken jylmen salystyrǵanda anaǵurlym joǵary ekenin aıtady. Mysaly, 2018 jyly fılıalda 200 myńnan asa batysqazaqstandyq elektrondy sıfrlyq qoltańba alyp, óz ózine qyzmet kórsetý alańynda 450 myńnan asa memlekettik qyzmet alypty.
Qazbek QUTTYMURATULY,
«Egemen Qazaqstan»
Batys Qazaqstan