Senbi, 7 sáýir 2012 7:53
Beısenbi kúni Astanada bokstan Azııa aımaǵy boıynsha Jazǵy Olımpııa oıyndaryna joldama beretin halyqaralyq lısenzııalyq týrnır bastaldy. Oǵan sary qurlyqtyń 28 elinen kelgen 131 bylǵary qolǵap sheberi qatysyp, 10 salmaq dárejesinde joldamalardy sarapqa salyp jatyr.
Senbi, 7 sáýir 2012 7:53
Beısenbi kúni Astanada bokstan Azııa aımaǵy boıynsha Jazǵy Olımpııa oıyndaryna joldama beretin halyqaralyq lısenzııalyq týrnır bastaldy. Oǵan sary qurlyqtyń 28 elinen kelgen 131 bylǵary qolǵap sheberi qatysyp, 10 salmaq dárejesinde joldamalardy sarapqa salyp jatyr.
Bizdiń elden bul týrnırge áli lısenzııa almaǵan tórt boksshynyń qatysatyny belgili. Sonyń ishinde Birjan Jaqyp (49 kg.) pen Vasılıı Levıttiń (91 kg.) salmaǵyndaǵy boksshylarǵa bir lısenzııa berilse, Ilııas Súleımenov (52 kg.) pen Danııar Eleýsinovtiń (64 kg.) salmaǵyndaǵy boksshylar fınalǵa shyqsa, joldamaǵa ıe bolady. Sondyqtan 52 men 64 kıloǵa qaraǵanda eń jeńil jáne aýyr salmaqtaǵy bizdiń jigitterge biraz ter tógip, joldama alý úshin týrnırdiń jeńimpazy ataný kerek.
Týrnır bastalǵan kúni bizdiń boksshylardyń eshqaısysy sharshy alańǵa shyqqan joq. Bul kúni 52, 56, 60, 64, 69 jáne 81 kılodaǵy ózge elderdiń ókilderi jekpe-jekterin ótkizdi. Al keshe 64, 75, 91 kılo salmaqtaǵy boksshylar rıngke shyqty. Sonyń ishinde bizdiń Danııar Eleýsinov ıordanııalyq Ibrahım Salehpen kezdesip, ony aıqyn basymdyqpen utty. Osy aıqasynda ol bapkerlerdiń júktegen mindetterin artyǵymen oryndady dese bolady. Degenmen, Danııarǵa áli bosańsýǵa bolmaıdy. О́ıtkeni, onyń salmaǵynda japon Matatsýgı Kavanıshı sııaqty birtalaı tájirıbeli boksshylar bar. Olar Eleýsinovke myqty qarsylas bola alady.
Basqa salmaqtarǵa kelsek, 49 kıloda Birjan Jaqypqa týrnırdiń ońaı bolmaıtyn túri bar. Muny jerebe tastalmaı turyp ishimiz sezgen. Solaı bolsa da til-kózimiz tasqa dep bizdiń boksshylar arasynda eń sońǵy bolyp sharshy alańǵa elimizdiń úmitin arqalap shyǵatyn Jaqypqa tek jeńis qana tileıik! Bir jaqsysy, onyń salmaǵyndaǵy qazirgi eń myqty boksshylar sanalatyn Olımpıada jáne álemniń úsh dúrkin chempıony qytaı Zoý Shımıń men mońǵol Pýrevdorj Serdamba Bakýde ótken álem chempıonatynda Tumandy Albıonǵa joldama alyp qoıdy. Osyny eskerip, Birjanǵa tek qamshyny basý ǵana qalyp otyr.
Kelesi 52 kılo salmaqta Ilııas Súleımenovke de bosańsýǵa bolmaıdy. Súleımenov elimizdiń senimin aqtaǵysy kelse, týrnırdiń jeńimpazy atanýǵa kúsh salýy kerek. Qazir bapkerler oǵan zor úmit artyp otyr. Onyń týrnırdegi basty qarsylasy mońǵol Týgstogt Naıanbaıar bolyp sanalady. Osy básekedegi alǵashqy jekpe-jeginde mońǵol boksshysy fılıppındik Reı Solıýdardy nokdaýnǵa jiberip, jeńiske jetti. Bul salmaqta taǵy tájik Jahon Kýrbanov ta bar.
Jalpy, bıylǵy týrnırge eń kóp boksshylardy ákelgen osy Tájikstan quramasy bolyp otyr. Olardyń qataryndaǵy aýyr salmaqtaǵy Dılovarsho Abdýrahmanov degen taǵy bir boksshy bizdiń Vasılıı Levıtpen alǵashqy kezdesýin ótkizedi. Bir qýanyshtysy, Levıtke jerebe joldas boldy. Ol týrnırdegi aıqasyn 8 sáýir kúni jartylaı fınaldan bastaıdy.
Osy salmaqta Mońǵolııa quramasyndaǵy Erbolat Tólek degen qazaq boksshysy keshe úndi Manprıt Sınghpen qolǵap túıistirip, jeńilip qaldy. 9 sáýirde 49 kıloda Birjan Jaqyp taǵy bir tájik Mırojıdın Karımovpen aıqasady. Eger Birjan qarsylasyn jeńse, jartylaı fınalda 11 sáýir kúni ózbek Shahobıdın Zoırovpen sharshy alańǵa shyǵady. Bul boksshy jerebe boıynsha shırek fınalyn ótkizbeıdi dep sheshilgen.
Jalpy, Astana týrnıri qyzyqty ótip jatyr. О́ıtkeni, ár salmaqta 6 boksshydan 20 boksshyǵa deıin óner kórsetýde. Osy jigitterdiń arasynda Bakýde ótken álem chempıonatynda bizdiń Ivan Dychko men Ádilbek Nııazymbetovten jeńilip, lısenzııa ala almaı qalǵan qytaı alyby Jan Jıleı men ózbek Abbos Atoevtar da bar.
Dastan KENJALIN.