Qurlyqtyń myqtysy – Ispanııa

Qurlyqtyń myqtysy – Ispanııa

Seısenbi, 3 shilde 2012 7:28

«Qyzyl fýrııa» bul ataqqa tarıhta birinshi bolyp qatarynan ekinshi márte qol jetkizip otyr

Shildeniń 1-i kúni Kıevte oınalǵan Eýropa chempıonatynyń fınalynda Ispanııa quramasy Italııa komandasyn 4:0 etip utyp, Eýropa chempıony atandy. Eger osylardyń arasynda, 2010 jyly «qyzyl fýrııanyń» álem chempıonatyn da jeńip alǵanyn eske alar bolsaq, bul onyń sońǵy tórt jyldyń ishindegi úshinshi tolaǵaı tabysy bolyp tabylady.

 

Seısenbi, 3 shilde 2012 7:28

«Qyzyl fýrııa» bul ataqqa tarıhta birinshi bolyp qatarynan ekinshi márte qol jetkizip otyr

Shildeniń 1-i kúni Kıevte oınalǵan Eýropa chempıonatynyń fınalynda Ispanııa quramasy Italııa komandasyn 4:0 etip utyp, Eýropa chempıony atandy. Eger osylardyń arasynda, 2010 jyly «qyzyl fýrııanyń» álem chempıonatyn da jeńip alǵanyn eske alar bolsaq, bul onyń sońǵy tórt jyldyń ishindegi úshinshi tolaǵaı tabysy bolyp tabylady.

Eýropa qarsylastardyń biri aıqyn basymdylyq tanytqan mundaı fınaldy kópten beri kórgen joq. Másele ıspandar­dyń chempıonat bastalǵaly beri birinshi ret osyndaı joıqyn oıynnyń jortýylyna jalyn qosqanynda ǵana emes. Olar óz elderindegi «Barselonanyń» eń bir keremet babynda turǵan kezinde usyna alatyn barynsha úzdik oıyndarynyń úlgisin kór­setti. Sardar Vısente del Bos­keniń sarbazdary úshin bul kúni alań ústinde artyq-aýys dop be­ris, bosqa júgiris, tipti bol­ma­ǵan esepti. Olar bárin óte dál, meılinshe naqty, qoldan kelge­ninshe taza istedi. Uıym­dastyr­ǵan kombınasııalarynyń ózi birinen biri asyp tústi. Sondaı kezderde arenanyń alqymynda bir ǵana komanda oınap jat­qan­daı áser qaldyrdy. Sebebi, oıyny quıyndaı uıytqyǵanymen, dáldiktiń dárgeıine bas urǵan ıspandardyń qımylyna ıtalıandar ilese almaı jatty.

Matchtyń basy eki jaqtyń da bir-birlerine qatań pressıng qoldana otyryp, saqtana áreket etýimen este qaldy. Al qaqpaǵa qaraı sartyldatyp saqpan atýdy appenındik jigitter bastady. Biraq aıyp alańynyń aýqymy­nan oraǵyta urylǵan dop darbazadan dúregeı ushty. Budan keıin pıreneılik qorǵaýshylar ıtalıandardyń mundaı erkinshi­ligine asa kóp jol bere qoıma­dy. Olar qarsy jaqqa birinshi qaýipti soqqyny 6 mınýtta aıyp dobyn oryndaý arqyly jasady. Osydan bastap ıspandardyń basymdylyǵy sát saıyn ulǵa­ıyp, tamshydan quralǵan teńiz­deı birte-birte kólemin kóbeıte berdi. Olar ıtalıandardy jan-jaqtan qyspaqqa alyp, dop be­rýdi múldem derlik qoıdy. Bu­ǵan «skýadra adzýrra» qat-qabat qorǵanysyn qarsy qoıdy. Endi ony buzyp-jaryp, ishke qaraı ótý ońaı bolmady. Degenmen, ıspandar munyń da ebin tapty. Olar bir-birlerine qys­qa qa­shyqtyqta pas bere otyryp, ózgeniń órisinen sańy­laý tapty. Alǵashqy soqqylar alystan uryldy – Andres Inestanyń aıaǵynan ushqan bul eki dopty da qorǵaýshylar jolaı qaǵyp úlgerdi. Budan soń eki ańdýshy­syn sońyna erte-merte alǵa umtylǵan Sesk Fabregas­tyń tas­taǵan dobyn Havı qaqpa baǵanynan sál ǵana joǵarydan zińk etkizdi. Osy tusta naǵyz sharasyzdyń halin keshken ıtalıandar qarsylastarynan dop­ty da tartyp ala almady, olardyń tolqyndanyp úıirilip kelip jatqan shabýyldaryn da toqtatýǵa álderi kelmedi. Ispan­dardyń osy tabandy shabýyly aqyry golǵa jetkizdi. О́ziniń qyr-sońynan qalmaı júrgen Djordjo Kellınıden oń qa­nat­tyń shegine qaraı sytylyp shyqqan Fabregas sál artqa burylyp, ala baýyr dopty Davıd Sılvaǵa qaraı dál baǵyt­tady. Al forvard óziniń basyna ádemi kelip qalǵan dopty quddy bir bılıardtyń tasyn urǵandaı etip, bir serpip qalyp, qarsy aldyndaǵy qaqpanyń tórine gúmp etkizdi – 1:0. Bir mınýttan keıin ıtalıan jaǵy osy goldyń qarymtasyn qaıtaryp kete jazdady. Standartty jaǵdaıda dop urý quqyǵyn alǵan olar táp-táýir kombınasııa uıymdastyr­dy. Biraq sońyna deıin múltik­siz oryndaı almady. Sonyń saldarynan ol birer bultalaqtan soń qaqpashy Iker Kasılıastyń oljasyna aınaldy. Italıandar osydan sońǵy birshama ýaqytty da jaman ótkizgen joq. Olar birneshe ret buryshtama dobyn berý arqyly ıspandardy óz aıyp alańyna qýyp tastady. Al qaqpaǵa qaraı soǵylǵan eki soqqynyń bireýi ǵana Kasılıas­tyń aldynan qaıtty.

Álbette, Ispanııa buǵan qa­ryzdar bolyp qalǵan joq. Olar taǵy da shuǵyl túrde qaý­yrt shabýylǵa kóshti. Taǵy da Kellını óz qanatyndaǵy pozısııasynda utylys tapty. Odan qash­qan dop Inestanyń aıaǵymen aıyp alańyna jetti. Osy jerde ony Andrea Pırlo odan ary aparǵyzbady. Osydan soń ıtalıandar oıyn tizginin qolǵa alýǵa biraz talaptanyp baqty. Buǵan eptep beı-jaı qaraǵan ıspandar sálden keıin qaıtadan atqa qonǵandaı áser qaldyrdy. Olar 35 mınýttan bastap qar­sy­lastarynyń aıyp alańyn biraz sharlady. Sodan soń ıtalıandar birer ret alǵa qaraı jóńkildi. Mine, solardyń sońǵysynda ıspandardyń qarsy shabýylyn jiberip aldy. Alań ortasynyń arǵy túkpirinen jedel alǵa asyrylǵan dop ǵalamat bir dál­dikpen Jordı Albany qaqpa­shy Djanlýıdjı Býffonmen birge-bir shyǵardy. Budan arǵy­sy sheberliktiń sheginen kórindi – 2:0. Italıandar osy goldan keıin taǵy da taıly-taıaǵy qal­maı kóterildi. Olardyń jappaı shabýyly Rıkkardo Montolıvo­nyń alystan jóneltken jalǵyz soqqysymen aıaqtaldy.

Ekinshi taımdy Italııa qura­masy quramdaǵy ózgerispen bas­tady. Shabýylshy Antonıo Kas­sanonyń ornyna shyqqan Antonıo Dı Natale alǵashqy sátte qarymta gol soǵýdyń sál aldynda qaldy. Onyń baspen urǵan doby nysanadan shamaly joǵa­ry ketti. Osy kezderi ıtalıandar ashyla shabýyl jasaýǵa áreket etti. Osyny jaqsy paı­dalanǵan ıspandar birneshe qaý­ipti joryqtar uıymdastyryp úlgerdi. Aıtalyq, Fabregastyń alystan urǵan doby baǵannyń janynan zý etti. Budan soń «qy­zyl fýrııa» oıynshylary aıyp alańyna topyrlaı kirdi. Olar­dyń soqqylaryn Býffon men qorǵaýshylar áýpirimdep júrip qaıtardy. Aqyrynda kezekti márte ishke ený Serhıo Ramos­tyń qulap bara jatyp baspen dop urýyna jol ashty. Osy dop ıtalıan qorǵaýshysynyń qoly­na sart etip tıdi de, baǵytyn ózgertip, jerge qaraı jantaıdy. Biraq portýgalııalyq referı muny kórse de, kórmegen boldy.

Osydan keıin ıtalıandarda shabýyldy óristetkennen ózge jol qalmady. Sonyń birinde 50 mınýtta Kasılıans qatty kelgen soqqyny aldyna qaıtardy. Ony qaıta soqpaq bolǵan Dı Natale múmkindikti bosqa jiberip aldy. Al ıspandardyń jaýaby budan áldeqaıda qaýipti shyqty. Kezek­ti goldy olar taǵy da qarsy shabýyl kezinde saldy. Italıan­dardyń alǵa asyrǵan dobyn jolaı ilip áketken Havı ony jedel Fernando Torreske jetkizdi. So­nyń arqasynda Býffonmen jek­pe-jek shyqqan Fernando qaq­panyń bir buryshyna dopty tas­taı saldy – 3:0. Sońǵy tórtinshi gol da osyǵan uqsas boldy. Bul joly Torres alańǵa endi ǵana shyqqan Hýan Mataǵa aıyp ala­ńy­nyń ishinde ádemi pas berdi. Esepti talqandaý dárejesine deı­in jetkizgen gol osylaı soǵyldy.

Oıynnan keıingi baspasóz máslıhaty kezinde, álbette, Ispanııa quramasynyń bas jattyq­tyrýshysy Vısente del Boske baqytty kórindi. Júzdesýdi ash­qan ol: «Bul ǵajaıyp oıynshylar. Olar qalaı oınaýdy bi­ledi jáne sony jasaıdy. О́ıt­keni, fýtboldy túsinetin elde týǵan. Bul ıspan fýtbolynyń keremet shaǵy. Biz ǵalamat match ótkizdik. Biraq ıtalıandardy da baǵala­masqa bolmaıdy. Bizdiń tek jolymyz bolyp ketti», – dedi. О́z kezeginde Italııa qura­ma­synyń bas jattyqtyrýshysy Chezara Prandellı de mynadaı iri eseppen utylǵandaryna qa­ra­mastan, ózderiniń birinshilikti tamasha etip ótkizgenderin aıtty.

Sonymen, kezekti fýtbol toıy tarqady. Ol bir qurlyq­tyń ǵana birinshiligi sanalǵa­ny­men, kúlli álemniń qulaq túrip, kóz qadaǵan naǵyz jaýhar dú­nıe­sine aınaldy.

Serik PIRNAZAR,

«Egemen Qazaqstan».