Oral qalasyndaǵy «Batys» óńirlik qolbasshylyǵy jáne 5517 áskerı bóliminiń ulttyq ulan jaýyngerleri 9 mamyr kúni Uly Jeńistiń 74 jyldyq merekesin qarsy alyp otyrǵan eń qart jaýynger Semen Akımovıch Danılınge tosynsyı jasady. Qarııa turatyn kópqabatty úıdiń aldyna Ulttyq ulan ofıserleriniń balalary jáne áskerı bólimniń úrmeli aspaptar orkestri kelip, «Prodedýshka» ánin shyrqaı jóneldi. Budan keıin soǵys jyldarynyń áıgili «Katıýsha», «Marsh, Slavıankı!» jáne «Den Pobedy!» ánderin jınalǵan kópshilik qosyla aıtty. Qart jaýyngerdiń ózi de bul kezde óńirine orden-medal toly sarbaz formasyn kıip, aýlaǵa shyqqan edi. Halyq ta jınalyp, balalar aýlaǵa tolyp ketken. Sap túzep, joryq jyryn shyrqaǵan jaýyngerlerge kishkentaı balalar shattana qosylyp, aıaqtaryn taq-tuq basady. Aınalasy áp-sátte túrli syılyqqa, qushaǵy gúlge tolǵan Semen Danılın mundaı tosynsyıdy kútpegenin aıtyp, kózine jas aldy.
«Batys» óńirlik qolbasshysynyń orynbasary podpolkovnık Baqyt Alazov qart jaýyngerdi uly merekemen shyn júrekten quttyqtap, árqashan saptan shyqpaı, saý-salamat bolýyn tiledi.
- Bizdiń elimizdiń árbir azamaty jarty álemdi sharpyǵan soǵys jyldarynyń qaıǵy-qasiretin jaqsy biledi. Sol bir Uly Otan soǵysynda óshpes erlik kórsetip, maıdan men tylda qany men terin tókken aǵa urpaqtyń tabandylyǵy men janqııarlyǵyn biz eshqashan umytpaımyz. Sizder taǵdyrdyń aýyr synynan súrinbeı ótip, keleshek urpaqtyń bostandyǵy úshin kúrestińizder! Álemdi fashızmnen qorǵap qaldyńyzdar! – dep atap ótti óz sózinde Baqyt Maǵaýuly.
«Batys» óńirlik qolbasshylyǵy Ardagerler keńesiniń atynan sóz alǵan zapastaǵy podpolkovnık Baqytjan Berdıev te ardagerge syı-sııapat usyndy.
Búginde elimizdegi kózi tiri eń qart maıdangerdiń biri Semen Danılın Kýrs oblysynda dúnıege kelgen eken. Brıansk áskerı-saıası ýchılıshesinde oqyǵan ol 1942 jyly urysqa kirip, Stalıngrad, Kýrs doǵasy, Dnepr shaıqastaryna qatysqan. Ýkraına men Polshany azat etken jaýynger jeńisti Kenıgsbergte qarsy alypty. Soǵystan keıin Ishki ásker qatarynda Almaty, Qaraǵandy qalalarynda qyzmet etip, polkovnık sheninde qurmetti demalysqa shyqqan. «Qyzyl juldyz», II dárejeli «Otan soǵysy» ordenderimen, «Urystaǵy erligi úshin», «Stalıngrad qorshaýy úshin», «Germanııany jeńgeni úshin» medaldarymen marapattalǵan ardager beıbit kúnde de túrli marapatqa ıe bolǵan.
Batys Qazaqstan