Sársenbi, 8 mamyr 2013 1:45
Qostanaıǵa eki kúndik saparmen Kanadanyń, Japonııanyń, Úndistannyń, Ońtústik Afrıka Respýblıkasynyń, Indonezııanyń, Iraktyń, Vatıkannyń Qazaqstandaǵy elshileri men Koreıa elshisiniń orynbasary, Qytaı Halyq Respýblıkasy elshisiniń keńesshisi jáne hatshysy, Oman Sultandyǵy elshisiniń hatshysy, Belgııa elshiligi saýda-ekonomıkalyq bóliminiń basshysy, Ispanııa Koroldigi elshiligindegi osyndaı bólimniń ókili keldi. «Eldestirmek – elshiden» degendeı, olardyń barlyǵy da Qostanaı oblysymen tanysýdy maqsat tutty.
Sársenbi, 8 mamyr 2013 1:45
Qostanaıǵa eki kúndik saparmen Kanadanyń, Japonııanyń, Úndistannyń, Ońtústik Afrıka Respýblıkasynyń, Indonezııanyń, Iraktyń, Vatıkannyń Qazaqstandaǵy elshileri men Koreıa elshisiniń orynbasary, Qytaı Halyq Respýblıkasy elshisiniń keńesshisi jáne hatshysy, Oman Sultandyǵy elshisiniń hatshysy, Belgııa elshiligi saýda-ekonomıkalyq bóliminiń basshysy, Ispanııa Koroldigi elshiligindegi osyndaı bólimniń ókili keldi. «Eldestirmek – elshiden» degendeı, olardyń barlyǵy da Qostanaı oblysymen tanysýdy maqsat tutty.
– Elshilerge oblysty tanystyrýdaǵy basty maqsat – óńirdiń ınvestısııalyq qaýqaryn tanytý. Múmkin osy elderdiń birimen ekonomıkalyq múddemiz toǵysyp qalar, – dedi oblys ákiminiń orynbasary Murat Dáribaev. Mundaı sharany ótkizýge oblys ákimdigi muryndyq bolǵan.
Qonaqtar aldymen oblys ortalyǵyndaǵy «Dostyq» úıinde boldy. Onda qazaq jeriniń bir shalǵaıy – Qostanaıdyń túrli ult ókilderiniń tatý-tátti turyp jatqan qut meken ekenine kózderi jetti. «Dostyq» úıindegi etnomádenı birlestikter jumysymen tanysty. Osynda jyl saıyn ótetin halyqaralyq «Altyn mıkrofon» balalar án baıqaýynyń jeńimpazdary kúshimen shaǵyn konsertti tamashalady. Oblystyq tarıhı-ólketaný mýzeıin aralaǵannan keıin qonaqtar «Sadchıkov» saýyn fermasynda, ken alyby – «Sokolov-Sarybaı ken óndirý birlestigi» aksıonerlik qoǵamynda, «Fırma Arasan» jaýapkershiligi shekteýli seriktestiginiń Rýdnyı fılıalynda boldy.
Eki kúndik sapardyń ekinshi kúni oblys ákimi Nuraly Sádýaqasov dıplomatııalyq korpýspen kezdesti. Oblystaǵy belgili kásipkerlerdiń qatysýymen úlken májilis ótti. Kezdesýde sheteldik qonaqtar Qostanaı oblysy ekonomıkasy men tabıǵı baılyǵy týraly habardar etildi. Odan keıin elshilerdiń oblys óndirisi jáne áleýmettik-mádenı nysandarmen tanysýy odan ári jalǵasty. Olar konfet shyǵaratyn «Baıan sulý» jáne sheteldik júrdek mashınalar qurastyratyn «AgromashHoldıng» aksıonerlik qoǵamdaryn, «Evraz Kaspıan Stal» jaýapkershiligi shekteýli seriktestigin, memlekettik tilde bilim beretin Zarechnyı orta mektebin, kórkemsýret galereıasyn, I.Omarov atyndaǵy qazaq drama teatryn, Jeńis saıabaǵyn aralap kórdi.
Názıra JÁRIMBETOVA,
«Egemen Qazaqstan».
QOSTANAI.