Qarym-qatynas arta túspek

Eki el arasyndaǵy saýda aınalymy búginde 350 mln. AQSh dollaryn qurap otyr. Muny keshe Astanada ótken Qazaqstan-Latvııa bıznes forýmynda Premer-Mınıstr Serik Ahmetov aıtty.

Forýmǵa Latvııanyń Pre­zı­denti Andrıs Berzınsh bas­ta­ǵan delegasııa qatysty. Dele­gasııa quramynda 70-ten astam adam bar. Olardyń arasynda mı­nıstrler men kásipkerler, eks­porttyq kompanııalarynyń je­tek­shileri kezdesedi. Forýmnyń A.Berzınshtiń elimizge resmı sa­parmen kelýine oraı ótkizilgeni málim. Is-sharany Latvııanyń ınvestısııa jáne damý agenttigimen yn­tymaqtastyqta júrgen Qazaq­stan­nyń saýda-ónerkásiptik pala­tasy, sondaı-aq elimizdiń Indýstrııa jáne jańa tehnologııa­lar mınıstrligi uıymdastyryp otyr. Sóz kezegi berilgen Latvııa Pre­zı­denti Qazaqstannyń táýelsizdik jyldary qol jetkizgen tabystaryna toqtalyp, eki el arasyndaǵy ekonomıkalyq ári mádenı baılanystardy damytýǵa árýaqyt múddeli ekendikterin bildirdi. Odan keıin sóz alǵan S.Ahmetov eki el arasyndaǵy qazirgi saýda aınalymynyń kólemin Qazaqstan mise tutpaıtynyn jetkizdi. Eki el arasyndaǵy saýda-ekonomıkalyq qarym-qatynastardy taǵy eki esege ulǵaıtýǵa múmkinshilik bar eken. Baltyq boıyndaǵy basqa eldermen salystyrǵanda bizdiń Latvııamen aradaǵy saýda-ekonomıkalyq aınalymymyz óte joǵary. Shynaıy sandy alar bolsaq ol shamamen 350 mln. dollardy quraıdy. Árıne, bul bizdi qanaǵattandyrmaıdy, eger bar múmkindikter men áleýetti tıimdi paıdalana bilsek, bul kór­setkishti eki esege ulǵaıtýǵa bolady. О́ıtkeni, qazirgi tańda elimizde 130-ǵa jýyq birlesken kásiporyn jumys isteýde. Sondaı-aq, Qa­zaq­standa eki eldiń kásipkerleri bir­lesip jumys isteı alatyn salalar jetkilikti, dedi Qazaqstan Premeri. Premer-Mınıstr Latvııada aýyl sharýashylyǵy salasynyń da órkendep damyǵany týraly áń­gi­meledi. Latvııa Eýropanyń dál ortasynda ornalasqan. Son­dyqtan jańa tehnologııalar trans­fertin qoldaný múmkindigine toqtalyp, shıkizatqa tehnologııa aıyrbasy ustanymyn ár kezde de paıdalaný kerektigin qa­dap aıtty. Forýmda Latvııanyń ekono­mıka mınıstri D.Palıýtsa, «Qa­zaqstan temir joly» UK» AQ-tyń prezıdenti A.Mamın, t.b. birneshe mekeme jetekshileri sóz sóıledi. Eki taraptyń memlekettik mekeme ókilderi men kásipkerleri jyljymaıtyn múlik, qarjy, zańdyq qyzmetin usyný, týrızm, kólik jáne logıstıka, aýyl sha­rýa­shylyǵy, qurylys, telebaılanys, bilim men ǵylym, t.b. salalar boıynsha yntymaqtasýdaǵy múm­kindikterdi talqylady. Tájirıbe almasty. Sóıtip, shara aıasynda eki eldiń mınıstrlikteri men vedomstvolary birqatar kelisimderge qol qoıdy.

Nurbaı ELMURATOV,

«Egemen Qazaqstan».