Ústimizdegi jyldyń aqpan aıynda Sankt-Peterbýrg qalasynda joǵalǵan Reseı ártisi Alekseı Osıpovtyń óli denesi 19 shilde kúni Kronshtadt qalasynyń mańyndaǵy Fın shyǵanaǵynyń aıdynynda tabyldy. Bul týraly «Moskovskıı komsomoles» gazeti jazdy.
Biraq A. Osıpovtyń týystary bul málimetke senýden bas tartyp otyr. Máselen, akterdiń baýyry Ivan Osıpov polısııanyń jeke málimetine kúmán keltiredi. «Biz isti júrgizip jatqan tergeýshimen únemi habarlasyp turmyz. Alekseı tabylǵan jaǵdaıda ol bizge habar beretin edi», – dep málimdedi Ivan.
Endi aılaqtan múrdesi tabylǵan azamattyń jeke tulǵasyn anyqtaý úshin oǵan DNK saraptamasyn júrgizý qajet.
Bir aıtatyn jaıt, 38 jasar ártis bıylǵy aqpan aıynda iz-túzsiz joǵalyp ketken bolatyn. Bul jaıynda onyń qurbysy Olga sol kezde polısııaǵa shaǵym aıtyp keldi. Sol kúni akter osy qyzben Fın shyǵanaǵy aýdanyna serýendep júrgen eken. Ol kenet muzdyń betimen biraz júrip qaıtpaq bolady. Al Olga onymen ermeı, jaǵalaýda qalyp qoıady. Alaıda, Alekseı sol ketkennen jaǵalaýǵa qaıta oralmaıdy. Ony kúte-kúte sharshaǵan qyz sosyn quqyq qorǵaý organdaryna júginedi. Keıinnen anyqtalǵandaı, sol kúni aıdynnyń ártis joǵalyp ketken aýdanynda muzdyń jarylyp, seńniń júrýi oryn alǵan kórinedi.
Biz sóz etip otyrǵan Alekseı Osıpov 1975 jylǵy 18 aqpanda Lenıngrad qalasynda ómirge kelgen. Sankt-Peterbýrg teatr óneri memlekettik akademııasynyń ártister daıarlaıtyn fakýltetin bitirgen. Ol kınodan 2001 jyldan kóreni bastady. Osy aralyqtan beri Alekseı «Baıǵus Nastıa», «Dúkennen shyqqan ekeý», «Jaqutty Baron», «Buzaqylar Peterbýrgi», «Tergeý qupııasy», «Tasjarǵan» sekildi birqatar teleserıaldarda oınap, kórermenderge tanymal boldy.
Aıdar О́risbaev.