Jaqynda Mońǵolııanyń Ulan-Batyr qalasynda kúres túrlerinen ótken Azııa chempıonatynda bizdiń grek-rım, erkin kúres jáne áıelder kúresinen synǵa túsken qyz-jigitterimiz bes altyn júldeni jeńip aldy.
Grek-rım kúresinde Aıdos Sultanǵalı (50 kg), Temirlan Shadýkaev (69 kg) Azııa chempıony atansa, erkin kúreste Nurjan Seıitjan (46 kg), al áıelder kúresinde Mádına Baqbergenova (56 kg) men Jámıla Baqbergenova (70 kg) bas júldege ıe boldy. Osy synda grek-rım kúresiniń balýandary Zelımhan Ýsmanov (42 kg), Elnur Muhamedjan (54 kg), Eldos Maǵzumov (76 kg) pen Salaýat Ahmetqalıev (100 kg) kúmis júldeni ıelense, qola júldeni Nurqanat Nurahmetov (63 kg) qanaǵat tutty. Sóıtip, bizdiń balýandar grek-rım kúresinde jalpykomandalyq esepte ekinshi oryndy alsa, birinshi oryndy Qyrǵyzstan quramasy, al úshinshi oryndy Iran komandasy ıelendi.
Erkin kúreste de balýandarymyz osaldyq tanytqan joq. Bul jerde bir ǵana altyn medal alsaq ta sportshylarymyzdyń kóbi fınalǵa, jartylaı fınalǵa shyǵýǵa múmkindik aldy. Onda Almas Jumabaev (42 kg) pen Zýlfıkar Mahamatov (63 kg) fınalǵa deıin jetip, kúmis júldeger atansa, Ilııas Jumaı (69 kg), Ádilet Qaltaev (76 kg), Ibragım Chıpchıkov (85 kg) pen Tımýr Joldasov (100 kg) qola júldeni mise tutty. Qazaqstan bul beldesýlerde jalpykomandalyq esepte úshinshi oryn aldy.
Áıelder kúresinde eki altyn júldeden basqa Svetlana Ankıcheva (40 kg), Anjelıka Shelchkova (52 kg) men Aısulý Bekalaeva (60 kg) kúmis júldege ıe bolsa, Marına Zýeva (46 kg), Móldir Qurmanbaı (49 kg) men Ázıza Turmaǵambet (65 kg) úshinshi orynnan kórindi. Bul básekede bizdiń qyzdarymyz alǵa japondardy jiberip, jalpykomandalyq esepte ekinshi oryndy enshiledi.
Azııa chempıonatyna Qazaqstan quramasyn aǵa jattyqtyrýshylar Serik Jumashev, Qaırat Saǵadıev pen Nurǵalı Rahmanqulov bastap bardy.